Oceano Pacifiko

Pacifiko esas la maxim vasta oceano de la Tero, havanta tota surfaco di 155 557 000 km² e kovranta 46% del aquala surfaco de la planeto. Ol iras del Arktika oceano norde til l'Antarktika oceano sude. Este jacas westala mar-rivo di Amerika, e sud-este ol ligesas al Oceano Atlantiko. Weste jacas l'estala e nordala mar-rivo di Australia, l'Indonezian arkipelago e l'estala mar-rivo di Azia. Sud-weste, ol ligesas al Indiana oceano. Lua mezavalora profundajo esas 4 mil metri. La punto nominata Challenger Deep, che Foso di Mariani, esas profunda de 10 920 metri, la maxim profunda punto de Terala surfaco.

Mapo di la Tero montranta l'Oceano Pacifiko.

Submara reliefo di Pacifiko (blue)

L'unesma Europano qua navigis en westala Pacifiko esis Portugalano António de Abreu, kande ilu vizitis l'insuli Maluku, en 1512. Vasco Núñez de Balboa deskovris lua estala rivo en 1513, pos ke ilu trairis l'istmo di Panama. En 1520, Fernão de Magalhães e lua kruani divenis l'unesma Europani qui navigis de Atlantiko til Pacifiko, trairinte ol dum l'unesma cirkumnavigado enrejistrita en la historio.