Official Monster Raving Loony Party
La Official Monster Raving Loony Party esas politikala partiso establisita en Britania en 1983 da la muzikisto David Sutch (1940-1999), anke konocita kom "Screaming Lord Sutch, 3rd Earl of Harrow", o simple "Lord Sutch" (Sinioro Sutch).
Ol esas notinda pro sua intence bizara politiko, ed ol esence existas por satire mokar britaniana politiko, ed ofrar su kom alternativo por protesto-voteri, aparte en distriki ube la partiso qua tenas sekura sideyo probable ne perdos ol.
La nuna duktero dil partiso esas Alan "Howling Laud" Hope.
Historio redaktar
Komence en 1963, David Sutch, chefo dil rock-grupo Screaming Lord Sutch and the Savages, kandidatesis en britaniana parlamental elekti sub diversa partiso-nomi, unesme kom la kandidato por la National Teenage Party. Tatempe la minima voto-evo esis 21 yari. La partiso-nomo vizis enfokigar perceptita hipokriteso, nam adolecanti ne darfis votar pro lia supozata nematureso, dum ke l'adulti qui jeris la lando intrikesis en skandali quala l'Afero Profumo.
Pos pafesar dum furto-probo dum habitar Usa, Sutch retrovenis a Britania ed a politiko dum la 1980a yari. La nomo "Raving Loony" unesme aparis che la interperioda elekto en Bermondsey, London di 1983.
Simila koncepto aparabis antee en la burleskajo "Election Night Special" en la programo Monty Python's Flying Circus, en qua la Stulta e Racionoza partisi konkurencis; e simila komediajo da Le Goodies, en qua Graeme Garden kandidatesis kom "Cienco-Folo".