Afero Profumo
La Afero Profumo esis britana politikala skandalo, di qua la origino esis kurta sexuala relato en 1961 inter John Profumo, la Milito-Ministro en la britana guvernerio di Harold Macmillan, e Christine Keeler, 19-yari-evanta aspiranta modelino.
En marto 1963, Profumo negis omna nedeco per personala deklaro a Parlamento, ma koaktesis konfesar la vereso pos kelka semani. Il demisionis de la guvernerio e de Parlamento. La reperkuti dil afero grave domajis la su-fido di prima ministro Macmillan, ed il demisionis en oktobro 1963. Lua Konservema Partiso domajesis da la skandalo, to quo forsan kontributis ad olua vinkeso da Labour en la nacional elekto di 1964.
Kande la afero Profumo-Keeler unesme revelesis, publika intereso augmentis pro raporti ke Keeler forsan samtempe relatis kun Kapitano Yevgeny Ivanov, Sovieta naval oficiro, tale kreinta posibla sekureso-risko. Keeler konocis e Profumo ed Ivanov per sua amikeso kun Stephen Ward, osteopato e sociano ilqua prisorgis elu.
Expozeso dil afero produktis rumori di altra skandali, e duktis ofical atenco al aktivesi da Ward, qua akuzesis pri serio de krimini kontre-etika. Perceptinta su kom "peko-kapro" di krimini da altri, Ward su-ocidis dum la final etapo di sua proceso; il esis kulpoza pro vivar per kontre-etika pekunio di Keeler ed elua amiko Mandy Rice-Davies.
Inquesto pri l'afero da seniora judiciisto, Sinioro Denning, indikis ke esis nula sekureso-brechi pro la Ivanov-konekto, ma la raporto da Denning pose kondamnesis kom surfacala e nekontentiganta. Profumo pose serchis privata repento kom voluntanto che Toynbee Hall, karitato en Estala London. En 1975 il esis oficale rehabilitita, ma il ne retrovenis a publika vivo. Il mortis en 2006.
Keeler penis eskapar la negativa imajo atachita ad elu da la jurnali, lego e parlamento dum la Afero Profumo. En diversa, mem kontredicanta naraci, el kontestis la konkluzi da Denning relate sekureso. La kondamno di Ward deskriptesis da uli kom ago venjala dal Establisuro, qua ne esis yusta.
Dramatigi redaktar
Esas plura dramatala versioni dil Afero Profumo por cinemo e teatro. La filmo di 1989 Scandal, kun Ian McKellen kom Profumo e John Hurt kom Ward, recevis favoroza recensi. Rivivo di intereso pri l'afero ditresigis la familio Profumo.
La foko dil teatrajo da Hugh Whitemore A Letter of Resignation, unesmafoye pleita che la Comedy Theatre en oktobro 1997, esis la reakto da Macmillan a la demisiono-letro da Profumo, quan il recevis dum vakanco en Skotia.
La muzikalo da Andrew Lloyd Webber Stephen Ward unesmafoye pleesis che la Aldwych Theatre en London ye 3ma decembro 2013. Inter generale favoroza recensi, la Daily Telegraph rekomendis ol kom "akuta, drola - e foye, vere emociganta" e "remarkinde fidela a la fakti".