Lingui di Hispania

En Hispania parolesas diversa lingui. La Hispana, oficala e precipua linguo en omna lando, esas matrala linguo dominacanta en preske omna autonoma komunesi. Sis ek la 17 autonoma komunesi havas altra kooficala linguo. Bilingueso en diferanta gradi e diferanta komunikativa situesi inter la Hispana e l'altra linguo esas habituala praktiko por multa Hispani qui vivas en ula ek l'autonoma komunesi.

Mapo dil lingui di Hispania.

Sequn inquesto de la yaro 2005, Hispana esas matrala linguo por 89% de la Hispani, Kataluniana, por 9%; Galisiana por 5% e la Baskiana, por 1%, dum ke 3% havus exterlanda matrala linguo. Ecepte la Baskiana, qua esas izolata linguo, omna lingui di Hispania apartenas a la grupo di latinida lingui, brancho del Indo-Europana linguaro.