Druidismo

Druidismo esis la pagana religio dil anciena Kelti. Lia precipua deaji esis la dei Esus, Belen e Teutates qui formacis triuneso qua ne esas sen simileso ad olta di Brahma, Vishnu e Shiva en la Hinduismo. L' adepti dil druidismo kredis ye la riinkarnaco e ne timis la morto pro ke por Kelto "la morto esas nur la mezo di longa vivo". La druidi ne esis nur sacerdoti ma anke ciencisti, mediki e legifisti. Probable li anke esis parapsikologiisti e savis magiala sekreti. Li, pluse, esis docisti e lia dicipuli docesis da li dum plu kam duadek yari. Li ne volis uzar literi nek libri, nam li asertis ke la skriburi esas mortintaji, dum ke nur la parolo esas vivanta.

Pos la konquesto di Gallia da la Romani, la druidismo esis severe represita, e la populala religio dil Galli mixesis kun la oficala religio dil Romani. Ma la druidismo desaparis erste kun la vinko dal Kristanismo. Tamen ulo posrestis de lia docado e savo en Wales, e nunepoke existas grupi e movementi qui asertas esar la heredanti dil anciena druidi.