Datumi-divulgo Facebook e Cambridge Analytica
La datumi-divulgo Facebook e Cambridge Analytica esis datumi-divulgo di kolekturo de personala informo pri c. 50 milion uzanti di Facebook, quin la angla firmo Cambridge Analytica komencis kolektar en 2014.
La datumi uzesis por influar votanto-opinioni por politikisti qui engajis li. Pos la divulgo, Facebook pregis pardono, ed experiencis publika klamo e plu basa aciono-preci; segun li, la maniero ye qua Cambridge Analytica kolektis la datumi esis "neapta".
En decembro 2015, The Guardian raportis ke la usana politikisto Ted Cruz uzis datumi de la divulgo, e ke la personi quin la datumi koncernis ne savis ke kompanii vendis, nek ke politikisti kompris lia personala informo. En marto 2018, The New York Times, The Guardian e Channel 4 News produktis plu detaloza raporti pri la divulgo per nova informo del olima employato di Cambridge Analytica, Christopher Wylie, ilqua provizis plu klara informo pri la grandeso dil divulgo, la naturo dil personala informo furtita, e komunikado inter Facebook, Cambridge Analytica, e politikala reprezentanti qui engajis Cambridge Analytica skope uzar la datumi por influar votanto-opinioni.
La divulgo esis signifikanta pro ke ol incitis publika diskuto pri etikala normi di sociala-reto-kompanii, politikala konsulto-organizuri, e politikisti. Konsumero-organizuri demandis plu multa protekto por konsumeri che sociala reti, e yuro a privateso, ultre restrikti di misinformo e propagando.