Cold Lazarus esas britaniana televizion-dramato de quar parti skribita da Dennis Potter, dum ke il savis ke il esis mortanta pro kancero pankreatala

Ol formacas la duesma duimo de paro kun la serio Karaoke.  La du serii cinematografesis kom un produkturo dal sama esquado; amba direktesis da Renny Rye ed Albert Finney pleas la dramatisto Daniel Feeld.  La serii esis unika pro esar kunprodukturi inter la BBC e Kanalo 4, kunlaboro demandita da Potter ante lua morto.  La programo unesme brodkastesis che Kanalo 4 en 1996 ye sundio-vesperi, kun repeto che BBC1 ye la sequanta dio.

Parti de Karaoke e Cold Lazarus cinematografesis en la Foresto di Dean en komtio Gloucestershire, ube Dennis Potter naskis e kreskis.

Cold Lazarus eventas dum la 24ma yarcento, en distopiana Britania ube la ruinita stradi esas nesekura, e la socio guvernesas da usana oligarki qui jeras potenta komercala korporacioni.  Experienci esas preske sempre virtuala, ed irgo autentika (quala kafeo e sigareti) sive interdiktesis, sive remplasesis per sintezala substitucanti.

Che resercho-instituto en London, financizata dal usana komercisto Martina Masdon (Diane Ladd), grupo de ciencisti duktata da Dr. Emma Porlock (Frances de la Tour) prilaboras rivivigar la mento dil 20ma-yarcenta dramatisto Daniel Feeld (Albert Finney), di qua la kapo frostigesis pos lua morto kurte pos l'eventi di Karaoke.  Vidanta nula profito en la projeto, Masdon pripensas cesigar ol, ma la komunikili-komercisto David Siltz (Henry Goodman), qua spionas Masdon, imaginas ganor fortuno per brodkastar la memori di Feeld che TV, e propozas a Porlock ke elua esquado laborez por lu.

Porlock ne savas ke membro di sua esquado, Fyodor Glazunov (Ciarán Hinds) esas membro dil rezisto-grupo RON ("Reality Or Nothing", Realeso o Nulo), qau vizas febligar la dependo da socio sur teknologio per exekutar violentoza ataki.

Dum ke plu multa pensi e memori di Feeld deskovresas, divenas evidenta ne nur ke la mento di Feeld koncias pri sua situeso, ma anke ke Feeld probas komunikar kun la ciencisti, e pledas permisesar mortar.  Lore Glazunov, Porlock e Luanda Partington (altra membro dil esquado) komencas pridubitar la etikaleso dil projeto.  Altra membro dil esquado, Watson, qua koaktesas informar pri sua kolegi, nesavante denuncas Glazunov kom RON-membro e sabotero.

Avertita, Glazunov iras a la laboratorio por liberigar Feeld de lua mizero.  En la konfronto sequanta, Glazunov povas ocidar Siltz, e, pos fina komuniko kun Feeld (inkluze okulo-kontakto), il destruktas la laboratorio, la kapo di Feeld, e su ipsa.