Café Landtmann esas tradicionala Wienana kafeerio situita en la strado Ringstraße an l'angulo di Lowelstraße 22, en l'unesma distrikto Innere Stadt di Wien, Austria.

Café Landtmann

La kafeerio okupas la ter-etajo dil Palais Lieben-Auspitz, proxim la Burgtheater, l'Universitato di Wien, l'urbodomo kun la Rathauspark,  e la Federala Kancelereyo.  Pro sua loko, la kafeerio esas populara renkontreyo por aktori, politikisti, oficisti, e jurnalisti, ed esas ofte la ceno di jurnalaro-konferi.

Café Landtmann fondesis da Franz Landtmann ye 1 oktobro 1873.  Originale de la distrikto Währing, Landtmann devenis de familio di kafeeriestri, mielokuko-bakisti, e fabrikisti di figo-kafeo.  Lor l'aperteso dil originala kafeerio, olua loko en la Ringstraße esis direte opozite du enorma konstrukteyi por la nova urbodomo ed universitato.

Internajo

En 1881, Landtmann vendis la kafeerio a du fratuli, Wilhelm e Rudolf Kerl, qui duris jerar la komerco sub la nomo Landtmann.  Pos la retreto da Rudolf Kerl, Wilhelm jeris la kafeerio sole e divenis lokala famozo pro ke homi quala Gustav Mahler, Sigmund Freud, ed Emmerich Kálmán vizits lu reguloze.  En 1916, pos jerar la komerco dum 35 yari, Wilhelm vendis Café Landtmann a Karl Kraus, olima buchisto e restoreriestro.

Dum l'autuno di 1926, Café Landtmann kompresis da Konrad ed Angela Zauner.  En 1929, la gespozi expansis e tote rinovigis la kafeerio, ed engajis la famoza arkitekto e profesoro Ernst Meller, qua desegnis multa Wienana kafeerii di ta epoko.  Dum ta rinovigo, Café Landtmann recevis sua extravagant e prodiganta interna dekoruri, qui ankore prezervesas til hodie, inkluze la quar ligna koloni ye l'enireyo, skultita da Hans Scheibner.  Pos la Duesma Mondo-Milito, Konrad transferis jero dil kafeerio a lua filiulo Erwin, qua duris jerar ol sucesoze til 1976, kande ol vendesis al familio Querfeld.

Dum jeresar da la familio Querfeld, Café Landtmann komplete rinovigesis ye signifikanta kusto en 1982, ed itere en 2001 e 2002.  Ye 1 oktobro 1998, okazione la 125ma aniversario di Café Landtmann, la familio Querfeld organizis granda partio quan asistis famozi del politikal e kulturala vivo dil urbo, ultre multa reguloza patroni.  En 2003, la famoza chef-garsono Robert Böck, anke konocata kom "Herr Robert," retretis pos servir ibe dum 28 yari. Dum sua longa historio, Café Landtmann servis kom renkontreyo por multa industrialisti, politikisti, penseri, ed artisti di Austria, ed esis la preferata kafeerio di Sigmund Freud, Gustav Mahler, Peter Altenberg, Felix Salten, ed Emmerich Kálmán.