Athos
Athos esas monto che la peninsulo Khalikidike, en Grekia. Ol jacas en fino di maxim esta “fingro” di Khalikidike-peninsularo. L'altitudo dil Santa Monto esas 2.033 m.
Athos esas anke monakio (o klostrio o klostro-republiko). Ol esas nedependanta parto di Grekia depos 1923. La reprezentanto dil stato di Grekia esas guberniestro en Karyes, la administrala centro di Athos. La guberniestro esas responsanta a ministro dil exterlanda aferi. En eklezial aferi patriarko di Konstantinoplo havas la supra povo.
La surfaco di Athos-monakio esas 350 km². Nune (2003) ibe lojas 1.600 monaki (o membri di klostro-socio). Karyes esas administrala centro e Defni esas chefa portuo. En Athos esas 20 chefa klostri, exemple, klostri di Gregorio e Iviron.
Klostrala vivo komencis en Athos mem en la 3ma yarcento, ma “oficala” enumerado di yari komencas en 963, kande Athanasius Athonana fondis klostro per suporto dal imperiestro di Bizanco. Dum lua prospero-ero en la 13ma yarcento vivis en Athos c. 40.000 monaki. En 1046 cezaro Konstantinus 9ma Monomakos imperis, ke mulieri, eunuki, senbarda homuli e femin animali ne devas pazar a sulo di Athos. Tamen la maxim granda parto de ikoni montras muliero, Virgino Maria.
Turisto-fluo aden Athos esas restriktita: 120 ortodoxa vizitanti e 14 altra-religia homuli povas venar Athos po dio. Nun anke senparda homuli povas vizitar Athos.
