Art Bell

Arthur William Bell III (17 junio 1945 - 13 aprilo 2018) esis usana radio-hosto, brodkastero ed autoro.

Il esis la fondinto ed originala hosto di la paranormala-tema radio-programo Coast to Coast AM, qua esas askoltebla per centi de radio-kanali en Usa e Kanada.  Il anke kreis ed esis hosto di la kompano-programo Dreamland.  Coast to Coast AM ankore brodkastesas omnanokte (kun altra hosti quala George Noory).

En 2003, Bell mi-retretis de Coast to Coast AM.  Dum la sequanta quar yari, il esis hosto dil programo dum multa semanfini che Premiere Networks.  Il anuncis sua retreto del semanfino-programo ye 1 julio 2007, ma de tempo a tempo servis kom gasto-hosto til 2010.

Klasika epizodi di Coast to Coast AM esas askoltebla en ula radio-merkati ye saturdio-nokti sub la nomo Somewhere in Time hosted by Art Bell.  Il startis nova noktala programo, Art Bell's Dark Matter, che Sirius XM Radio, qua komencis ye 16 septembro 2013.  Ol finis sis semani pose, ye 4 novembro 2013.

Ye 20 julio 2015, il retrovenis a radio per nova programo Midnight in the Desert, qua esis askoltebla enrete per TuneIn ultre ula terala radio-kanali.  Il anuncis sua finala retreto ye 11 decembro 2015, citinta sekureso-sucii che sua hemo.  Segun Bell il e lua familio subisis repeta intruzi en sua hemo en Pahrump, Nevada.  L'intruzi inkluzis fusilo-pafi, ed il pri-timis la sekureso di sua familio.  Il selektis iivar radio e tale, publika vivo.

Bell esis la fondinto ed originala proprietanto dil radio-kanalo KNYE 95.1 FM  en Pahrump.  Lua brodkasteyo e transmisilo situesis proxim lua hemo en Pahrump, ube il anke brodkastis Coast to Coast AM.  Tamen, de junio til decembro 2006, il habitis la Filipini.  En marto 2009, il retroiris a la Filipini kun sua familio pos ke il experiencis signifikanta desfacilaji pri obtenar a Usa-visto por sua spozino, Airyn.

Frua vivo

Arthur William Bell III naskis en Norda Karolina ye 17 junio 1945.  Segun diferanta fonti il naskis od en Jacksonville od en Camp Lejeune.

Bell sempre interesis pri radio; ye l'evo 13 yari, il divenis amatora radio-operacero.  Bell posedis la radio-licenco Amateur Extra Class.  Lua voko-signo esis W6OBB. Bell servis en la usana aer-armeo kom mediko dum la Vietnam-Milito, e dum sua libera tempo operacis "pirato"-radio-kanalo.  Il intence pleis kontre-milita muziko (quala la kansoni Eve of Destruction e Fortunate Son) qua ne pleesis che la American Forces Network.

Kariero

Dum la frua 1970a yari, Bell habitis en Watsonville, Kalifornia, e laboris por KIDD 630 AM en Monterey, Kalifornia.  Il anke laboris por KMST kanalo 46.

Bell esis disk-jokeo qua pleis rock-muziko ante ke il adoptis parolo-radio.  Lua originala tarda-nokta programo che KDWN en 1978 esis politikala telefon-programo sub la nomo West Coast AM.  En 1988, Bell ed Alan Corberth rinomzis la programo Coast to Coast AM e movis sua brodkasto de la Plaza-Hotelo en Las Vegas a la hemo di Bell en Pahrump. Bell abandonis ordinara politikala diskuto favore temi quala fusilo-limitizo e konspiro-teorii, to quo duktis a signifikant augmento di lua dumnokta audantaro.  La foko dil programo ri-chanjis signifikante pos la bomb-atakto en Oklahoma-Urbo en 1995.  Multi en la komunikili ne volis blamesar pro incitar kontre-governeria o milical agi quala ta bombardo.  Pose, Bell diskutis neortodoxa temi quala lo paranormala, lo okulta, NFO-i, proto-cienco e pseudo-cienco.

Dum sua tempo che KDWN Bell renkontris e mariajesis kun sua triesma spozino, Ramona.