Antoinismo
Patro Antoine (pronuncez Antwan) (1846 til 1912) esis France-parolanta Belgo de modesta familio. Dum lua yuneso, ilu esis fervoroza katoliko e pose interesesis pri la spiritismo. Fine, ilu kreis ipsa lua propra religio quan onu plu tarde nomizis "l'Antoinista kulto". L' Antoinismo havas severa etiko per asertar ke lo Mala qua trovesas en ni esas nia maxim mala enemiko, ma lo sama qua esas che altra personi esas nur reflekto di nia propra maligneso. Konseque ni devas esar gratitudoza a nia enemiki qui docas a ni leciono e facas granda bonajo a ni per la sufri quin li subisigas da ni e tale posibligas nia spiritala progreso. Ne esas sacerdoti che la Antoinismo, nur homi quin onu nomizas la travestiati e qui esas vestizita simila a katolika sacerdoti e monakini. La travestiati direktas la pregi e lektas la santa libro di l' Antoinismo (konsistanta ek diskursi di patro Antoine). Li konsultesas private da la kredanti qui esas malada e risanigas li per pregi e superpozo di la manui. Ma l' Antoinisti darfas irar a mediki e flegesar normale. L' adepti di l'Antoinismo kredas la realeso di la riinkarnaco e l' existo di la spiriti. L' Antoinismo qua esas sinkretismo di katolikismo, spiritismo ed Hinduismo esas tre tolerema e ne postulas exkluziveso di religiala praktiko a lua religiani. Tale l' Antoinismo esas fortunoza excepto che la sekti, qui kustumale probas konservar lia kredanti per omna moyeni.
