Alet-les-Bains
Alet-les-Bains (Alet en Ocitaniana, olima ortografio Aleth) esas komono en la departmento Aude en la regiono Occitanie en sudala Francia.
Alet-les-Bains situesas proxim termo en Aude en sudala Francia. La vilajo distas cirkume un e duima hori del maro, ed un horo de vintro-sporto-centro. Ambalatere dil vilajo, la monti atingas alteso de 750 metri super maro-nivelo. Aceso al fervoyo SNCF esas trovebla che la staciono Alet-les-Bains.
L'origino dil abadeyo di Alet-les-Bains esas nesavata, ecepte prioreyo en la okesma yarcento. Ol probable fondesis da Béra, viskomto di Razés. En la dekeduesma yarcento, ol havis granda influo e multa pilgrimanti. En 1318, l'abadeyo divenis episkopio por durar la lukto kontre la Katari; tale ol restis til la Franca Revoluciono. La diocezo havis okadek parokii e kovris areo de Formiguères til Saint-Paul-de-Fenouillet. Muro, kun quar pordegi, konstruktita en la dekeduesma yarcento por protektar l'abadeyo, esas ankore videbla hodie.
En la dekesisesma yarcento, dum la religio-militi, la Hugenoti brulis e destruktis l'abadeyo. En la dekesepesma yarcento, Nicolas Pavillon, episkopo di Alet qua defiis la guvernerio di Rejo Louis XIV, povabus trovar la moyeni reparar l'abadeyo, ma sentis ke, donite la povreso dil homi en sua diocezo, lo esabus neaceptebla. Il ya tamen konstruktis ponto trans Aude en 1662 e provizis plubonigita irigaco-sistemo.
Vidindaji
- Abadeyo e katedralo del dekesepesma yarcento
- Mezepokala, fortifikita kastelo
- Hoteli de la dekeduesma e dekequaresma yarcenti
- Fonto de termale varmigita aquo, deskovrita dal Romani plu kam duamil yari ante nun
- Termo
L'aquo di Alet-les-Bains esas un ek la maxim anciena vendata mineral-aqui en Francia, unesme enboteligita plu kam 120 yari ante nun, ol esas un ek la maxim granda fonti en Francia. La vilajo esas tre vivaca e posedas kazino, termo, plura hoteli, e plura butiketi. Esas un generala butiko.
Ciné Sans Filet esas festivalo pri kurta filmi qua eventas omnayare dum la duesma semanfino di agosto; ol inkluzas cent-e-kinadek kurta filmi dum tri dii.
Dum la 21ma yarcento multa britaniani translojis ad Alet-les-Bains.