Vertumnus (pikturo)
Vertumnus esas pikturo dal manierista piktisto Giuseppe Arcimboldo produktita en Milano c. 1590–1591.
La pikturo esas lua maxim famoza verko ed esas portreto di la Santa Romana Imperiestro Rudolf II ri-imaginita kom Vertumnus, la Romana deo di metamorfosi en naturo e vivo; la frukti e legumi simbolizas la abundo dil Ora Epoko dum la regno dil Imperiestro.
De fore, la kapricoza pikturi da Arcimboldo forsan aspektas quale portreti, ma li kompozesas uzante legumi, libri, planti, koquo-utensili, olei, frukti, mar-animali, animali ed arboro-radiki, singla objekto selektita por krear impresiono dil anatomiala traiti di homala vizajo. La portreto dil imperiestro esas kreita ek planti - flori e frukti di omna sezoni: gurdi, piri, pomi, cerizi, vitberi, frumento, artichoki, pizosheli, maizo, onyoni, kaulo-folii, kastani, figi, morusi, pruni, grenadi, diversa kukurbiti ed olivi.
La portreto di Rudolf esas kompozita ek frukto, legumi e flori por simbolizar la perfekta equilibro e harmonio kun naturo reprezentita da lua regno. Ica portreti esis expreso dil facineso dil Renesanco-mento pri enigmati e lo bizara. La tradicionala religiala temi da Arcimboldo pose obliviesis, ma lua portreti di homala kapi kompozita ek objekti grande admiresis tatempe.
La pikturo Vertumnus apartenas la kolekturo che Kastelo Skokloster, en Suedia.