Up series

La Up series esas britaniana serio de dokumentalo-filmi produktita da Granada Television por ITV, qua sequas la vivi di dek-e-quar britaniana pueri depos 1964, kande li evis sep yari.

La dokumentalo havis non epizodi - un epizodo ye singla sep yari - tale trans periodo de 56 yari.  Omna epizodi brodkastesis che ITV, ecepte la sisesma, qua brodkastesis che BBC One.  Ed individua filmi, e la serio entote recevis plura premii.

La pueri selektesis por l'originala programo, Seven Up! (1964), por reprezentar la diverseso de socio-ekonomiala fundi en Britania tatempe, kun l'explicita supozo ke la sociala klaso di singla puero predeterminas lua futuro.

L'unesma epizodo facesis kom "unika epizodo" dil serio da Granada Television, World in Action, direktita dal kanadano Paul Almond, kun kontributo da "fresha yuna reserchero, meza-klasana gradizito de [l Universitato di] Cambridge", Michael Apted, di qua la rolo en l'unesma programo inkluzis "parserchar la skoli dil naciono por trovar 14 apta pueri".  Pri ta unesma programo, Apted dicis,

"Ol esis filmo di Paul ... ma plu interesis lu facar bela filmo pri evar sep yari, kontre ke me volis facar desneta verko pri ca pueri qui havas omno, e ta altra pueri qui havas nulo."

Pos ke Almond direktis l'originala programo, la direktisto Michael Apted durigis la multa-parta serio per nov epizodi ye singla sep yari, e cinematografis materio pri ti, ek la dek-e-quar originala partopreninti, qui selektis partoprenar.  La skopo dil duranta serio asertesis ye la komenco di 7 Up tale:  "Pro quo ni asemblis ica [pueri]?  Pro ke ni deziris regardeto di Anglia en la yaro 2000.  La sindikatestro e la komerco-exekutivo di la yaro 2000 evas nun sep yari."

La maxim recenta epizodo, la nonesma, titulizita 63 Up, brodkastesis en la Unionita Rejio che ITV ye 4 junio 2019.  Apted reportite dicis, "Me esperas facor 84 Up kande me evos 99 yari."