Supermerkato

Supermerkato esas komerceyo qua ofras konsumo-vari per ipsaservebla sistemo, ordinare vendanta li endetale, ma kelkafoye anke vendanta engrose. Ordinare, supermerkati vendas nutrivi por homi ed anke por dorlotobestii, drinkaji, produkturi por netigo di domi e di stofi, produkturi por higieno personala (saponi, shampunaji, papero higienala...), stofi, sigaretuyi e parfumi.

Interna areo di supermerkato en Anglia.

Parkeoloko di supermerkato en Japonia.

Ordinare, klienti di ula supermerkato eniras ol impulsanta vetureto o korbeto ube li pozas vari quin li deziras komprar. Pose li iras a pago-kasi, ube la sumo di preci di omna produkturi selektita, e la kliento selektas se deziras pagar uzanta pekunio o kredito-karto.

L'unesma moderna supermerkato kreesis da Usan entraprezisto Vincent Astor, qua fondis Astor Market en 1915. Tamen, ol nesucesis e klozis en 1917. Dum la yari 1930a, supermerkati populareskis en Usa, pro ofro di diverseso di produkturi ed ordinare havar loki por parkear* automobili.

Nun, granda supermerkati anke povas vendar produkturi por automobili, por kampar, elektronikala produkturi, edc.