Plymouth (kolonio)
L'unesma kolonigiisti di Massachusetts esis pilgrimeri, qui establisis su en Plymouth en 1620. Granda parto di la pilgrimeri originis de Haverhill, Suffolk, Anglia. Li establisis bona relati kun l'indijeni.
La voyajo redaktar
Ye la 6ma di septembro 1620, navo Mayflower departis de Plymouth, Anglia, portante 121 pasajeri, qui deziris eskapar de religiala persekutado e fondar nova kolonio. Li renkontris tempestoza vetero dum la voyajo, e li konsideris retro-irar kande la navo esis domajata; tamen la domajo esis reparata e li duris; li vidis tero ye 9ma di novembro.
Kontakto kun indijeni redaktar
Ye la 16ma di marto 1621, kelka semani pos la fondo di la kolonio Plymouth, ula indijeno marchis aden la kolonio e salutis la kurioza habitanti en la Angla linguo, "Welcome, Englishmen!" Il introduktis su kom Samoset, ed explikis ke il rezidas ye vicina insulo, ube Angla peskisti frequentas, de qui il ulgrade lernis la Angla linguo. Ilu explikis anke, ke la lokala indijena vilajo Patuxet esis abandonata pro plago e ke la supra chefo di la regiono esas Massasoit, chefo di le Wampanoag. Samoset departis ye la sequanta dio, promisante retrovenar pos kelka dii kun kelka viri di Massasoit. Ta viri arivis, inkluzante Massasoit ipsa. Ye la 22ma di marto, guvernanto John Carver e Massasoit establisis pacokontrato.
L'Unionita Kolonii redaktar
L'Unionita Kolonii di Nova Anglia fondesis ye la 19ma di mayo 1643. La guvernerii di Massachusetts, Plymouth, Connecticut e New Haven konsentis kooperar; la precipua skopo esis defenso kontre indijena tribui qui saveskabis la atakebleso di la kolonii, e qui savis ke la koloniisti, pro la lora interna milito en Anglia, ne povis facile demandar sokurso de Anglia. Edward Winslow, un ek la la voyajanti ad Amerika en 1620 en la navo Mayflower, havis rolo en la fondo di la Unionita Kolonii. Il esis importanta en ca periodo; il developis relati kun indijena tribuo, e plurafoye voyajis ad Anglia por traktar aferi kun komercisti e guvernala oficisti. Il esis trifoye guvernanto di la kolonio Plymouth.