Peter-principo
La Peter-principo esas jero-koncepto developita da Laurence J. Peter, qua observas ke homi en hierarkio tendencas acensar til sua "nivelo de nekompetenteso".
Altravorte, employato promocesas surbaze lua suceso en antea roli, til ke lu atingas nivelo ye qua lu ne plus esas kompetenta, nam habilesi en un rolo ne necese esas transferebla ad altra. La koncepto explikesis en la libro di 1969 The Peter Principle da Peter e Raymond Hull.
The Peter Principle editesis da William Morrow and Company en 1969. Peter e Hull intencis ke la libro esez satiro, ma ol divenis populara pro ke ol facis serioza punto pri la falii di quale homi promocesas en hierarkiala organizuri. Hull skribis la texto, surbaze la resercho da Peter. La Peter-principo esis la temo di multa posa komento e resercho. La Peter-principo asertas ke persono qua esas kompetenta en sua rolo ganas promoceso a plu seniora ofico qua bezonas diferanta habilesi. Se la promocita persono indijlas la habilesi bezonata por sua nova rolo, lu esos nekompetenta ye sua nova nivelo, e do lu ne promocesas itere. Ma se lu esas kompetenta en sua nova rolo, lu promocesas itere, e lu duras promocesar til ke lu fine atingas nivelo ye qua lu esas nekompetenta. Esante nekompetenta, lu ne darfas promocesar itere, e do restas ye ta finala nivelo dum sua cetera kariero (la tale-nomizita "Finala Ofico" o "Platajo di Peter").
Ta rezulto esas neevitebla, pos sat multa tempo e supozante ke esas sat multa ofici en la hierarkio a qui kompetenta employati povas promocesar. La Peter-principo esas do expresebla tale: "En hierarkio omna employato tendencas acensar a sua nivelo de nekompetenteso." To duktas a la Korolario di Peter: "Pos sat multa tempo, omna rolo tendencas okupesar da employato qua esas nekompetenta exekutar sua funcioni." Hull nomizas la studio pri quale hierarkii funcionas "hierarkiologio."