Paul Revere
| Paul Revere | ||
| ||
| Profesiono: | arjentisto, grabisto, industrialisto | |
| Lando: |  Usa
| |
| Naskodato: | 1 di januaro 1735 | |
| Nasko-loko: | North End, Boston | |
| Mortodato: | 10 di mayo 1818 | |
| Morto-loko: | Boston, Massachusetts, Usa | |
Paul Revere (pr. c. Rivir; 21ma di decembro 1734 - 10ma di mayo 1818) esis usana arjentisto, grabisto, frua industrialisto, e Patrioto en l'Usana Revoluciono.
Il esas konocata pro lua noktomezo-kavalko por alarmar la koloniala milico en aprilo 1775 pri la proximesko di britana soldati ante la batalii di Lexington e Concord; la kavalko dramatigesis en la poemo da Henry Wadsworth Longfellow, "Paul Revere's Ride" (1861).
Ye evo 41, Revere esis prosperoza, establisita ed eminenta arjentisto en Boston. Il helpabis organizar informo- ed alarmo-sistemo por surveyar la britana armeo. Revere pose servis en la Massachusetts-milico, ma lua servo finis pos la Penobscot-Expediciono, un ek la maxim dizastroza kampanii dil Usana Revolucionala Milito, pri qua il absolvesis.
Pos la milito, Revere retroiris al arjentisto-komerco. Il uzis la profiti de sua sucesoza komerco por financizar sua laboro pri fero-giso, giso di bronza kloshi e kanoni, e forjo di kupra bolti e klovegi. En 1800 il divenis la unesma usano qua sucesoze rulis kupro aden folii por uzo kom futero en milito-navi.
Frua vivo
redaktar
Revere naskis en la North End di Boston ye 21ma decembro 1734, segun la Anciena kalendario lore uzita, od 1ma januaro 1735, en la moderna kalendario. Lua patro, franca Hugenoto qua naskis kom Apollos Rivoire, venis a Boston evinta 13 ed esis aprentiso dil arjentisto John Coney. Kande il mariajesis kun Deborah Hitchborn, membro di establisita Boston-familio qua proprietis mikra warfo, en 1729, Rivoire ja angligabis sua nomo a Paul Revere. Lia filiulo, Paul Revere, esis la triesma de 12 filii e fine la maxim olda transvivinta filiulo. Revere kreskis che la Hitchborn-familio, e ne lernis la linguo di lua patro. Evinta 13 il livis skolo e divenis aprentiso di sua patro.
La arjentisto-komerco furnisis a lu konekti kun diversa parti de la socio di Boston, to quo servis lu bone kande il divenis aktiva en la Usana Revoluciono. Koncerne religio, quankam lua patro asistis Puritana oficii, Revere atraktesis al Eklezio di Anglia. Revere komencis asistar la oficii dil politikala e provokiva Jonathan Mayhew che la West Church. Lua patro ne aprobis, e rezulte patro e filiulo interbatis unfoye. Revere cedis e retrovenis al eklezio di lua patro, ma il ya amikeskis kun Mayhew, e retroiris a la West Church dum la tarda 1760a yari.
La patro di Revere mortis en 1754, kande Paul esis legale tro yuna esar mastro dil arjenterio dil familio. En februaro 1756, dum la Franca ed Indijena Milito (la Nord-Amerikana teatro dil Sep-Yara Milito), il adheris la provincal armeo. Il forsan decidis agar to pro la febla ekonomio, nam armeo-servo ofris reguloza salario. Komisita kom duesma lietnanto en provincal artilrio-regimento, il pasis la somero che Fort William Henry an Lago George en Nova-York, dum faliinta projeto pri kaptar Fort St. Frédéric. Il ne restis longe en l'armeo, ma retrovenis a Boston e jereskis la arjenterio sua-nome. Ye 4ma agosto 1757, il mariajesis kun Sarah Orne (1736-1773); lia unesma filio naskis ok monati pose. Il e Sarah genitis ok filii, ma du mortis yune, e nur un, Mary, transvivis sua patro.