North Sea Jazz Festival
La North Sea Jazz Festival esas yarala muzikfestivalo quo organizesas dum la duesma semanfino di julio.
.jpg)
Til 2005 la festivalo eventis che la World Forum Convention Center en Den Haag (lore nomizita Congresgebouw); de 2006 ol eventas che Ahoy en Rotterdam. Depos 2013 la festivalo oficale havas la nomo Port of Rotterdam North Sea Jazz Festival.
La tri-dia festivalo fondesis da Paul Acket, komercisto e jaz-amanto, qua dum la 1960a yari sucesis per la muzikrevui Muziek Express e Popfoto. Kande il vendis sua kompanio en 1975, il povis developar la North Sea Jazz Festival nedepende e developar meceni.
Antee organizis Acket kunlabore kun la usana jaz-impresario George Wein tri-dia jazfestivalo che De Doelen en Rotterdam. La Newport Jazz Festival in Europe eventis ibe de 1966 til 1975, kande la municipo Den Haag abolisis la amuzo-imposto ed Acket movis la festivalo adibe.
Acket deziris prizentar diversa jazo-stili, de usana jazo ad europana avant-garde. En 1976 eventis la festivalo unemsafoye en Den Haag: sis estradi, 30 hori de muziko e 300 musikisti atraktis plu kam 9000 vizitanti. Diversa famoza jaz-muzikisti pleis, inkluzanta Sarah Vaughan, Count Basie, Dizzy Gillespie, Miles Davis e Stan Getz, plus la nederlandana avant-garde. Depos la morto di Paul Acket en 1992 la festivalo organizesis da koncert-aranjero Mojo.
La festivalo depose expansis a dekekin estradi, 1200 artisti e plu kam 23.000 vizitanti diale. Ultre plei da famozi quala Miles Davis, Ella Fitzgerald, Sarah Vaughan, Lionel Hampton, Eric Clapton, Herbie Hancock, George Benson, Van Morrison, Erykah Badu, Candy Dulfer, Steve Coleman, Nat Adderley, Ibrahim Ferrer, Alicia Keys, Al Jarreau, B.B. King, Wynton Marsalis, Trijntje Oosterhuis, Jamiroquai e The Zawinul Syndicate, ofras la North Sea Jazz Festival specala estrado a nova talento. Nomi di artisti qui che la festivalo unesmafoye ïntroduktesis al europana publiko esas Shirley Horn, Tania Maria, Roy Hargrove e Rachelle Ferrell.
De 2006 eventis la North Sea Jazz Festival che nova loko, Ahoy Rotterdam, pro ke la organizanti opinionis ke la World Forum Convention Center, pos demoliseso di plu kam duimo dil komplexo, ofris nesuficanta spaco por la festivalo. Ahoy esas kelka plu granda kam la olima loko, to quo ofras plu bona vidlinei e trafluo dal publiko inter diversa koncert-hali. La kapaceso dil festivalo ne augmentis, do la 'spacoza' karaktero duras en la nova loko.
Ultre la festivalo en Rotterdam eventas depos 2010 anke versiono sur Kuracao: la Curaçao North Sea Jazz Festival.