Nederlandse Omroep Stichting

La Nederlandse Omroep Stichting (NOS, en Ido: Nederlandana Brodkasto-Fonduro) esas un ek la brodkast-organizuri qui kompozas la Nederlandana Publika Brodkasto-sistemo.

Simbolo dil Nederlandse Omroep Stichting

Ol havas specala statutala obligeso facar novaji- e sporto-programi por la tri publika televizion-kanali di Nederlando, e nederlandana publika radio-servi.

La skopo dil fonduro definesas da la lego Mediawet 2008, qua stipulas ke la NOS produktez reguloza e frequa programi di naturo publiko-servala, inkluzante plena e senpartisa novaji-servo, e raporto pri parlamentala procedi e debati, ultre raportar pri sportala ed altra nacionala eventi.

La NOS anke agas kom teknikala koordinero di la nederlandana publika brodkasto-sistemo entote. Evente di urjantesi ed/o l'emerso di granda novajo, ol povas direkteskar la publika reti por provizar koordinata raporto di eventi, kun altra membri di la sistemo.

La NOS havas korespondanti en multa landi, inkluzanta permananta kontoro en Washington DC.

Programi produktata da la NOS inkluzas diala televizion- e radio-buletini, la NOS Journaal. Parlamentala raporti brodkastesas de specala kontoro en Den Haag. Ol anke provizas novaji-programi qui vizas pueri (Jeugdjournaal), dekedevanti e yuna adulti (NOS Headlines, NOS Journaal op 3) e sporto-fanatiki (NOS Langs de Lijn, NOS Studio Sport). Programi esas havebla per televiziono, radio ed interreto. La NOS anke brodkastas texto-pagini e reto-situo, amba multe uzata.

Historio redaktar

La Nederlandse Omroep Stichting (NOS) fondesis ye 29ma mayo 1969 ek la antea Nederlandse Televisie Stichting (NTS), e la Nederlandse Radio Unie (NRU).

 
Edifico dil NOS che la Media Park en Hilversum

La konocata simbolo dil NOS, kun la ronda ed obtuza anguli, qua uzesis til 2005 desegnesis da Johan Volkerijk. De 1969 la NOS provizis ne nur radio- e televizionprogrami di sociala skopo, ma provizis, developis e konstruktis anke omno teknikala necesa por realigo di radio- e televizionprogrami. Tale jeris la Facilitair Bedrijf dil NOS omna radio- e televizionregistrageyi, raporto-vehili, dekoro-ateliero ed orkestri quala la Metropole Orkest.

La NOS anke reprezentis la nederlandana brodkasterii exterlande, por, exemple, vendar produkturi di nederlandana brodkasterii. Inverse la NOS kompris exterlandana produkturi por Nederlando. En la komenco dil yari 1980ma, 2100 homi laboris che la Facilitair Bedrijf dil NOS.

Ye 1ma januaro 1988, lor la endukto dil nova Mediawet, ica taski transferesis a la komercala kompanio Nederlands Omroepproduktie Bedrijf (NOB), qua ye la fino di 2007 fendesis, pro quo televizionregistrageyi en la Studiocentrum che la Media Park e raporto-vehili transferesis a DutchView, e la altra registrageyi e NOB Decor aquiresis da United Broadcast Facilities.

Ye 1ma januaro 1995 la faki por brodkasto di kulturala, informiva, minoritato- e yunaro-programi ekfendesis kom Nederlandse Programma Stichting (NPS).

Programi redaktar

Ye 5ma januaro 1956 eventis la unesma brodkasto dil NTS-journaal, la preirinto dil NOS Journaal. Pos duadek-e-kin yari komencis specala jurnalo por yuni, la Jeugdjournaal. De 1992 til 2010 provizis la NOS kun VARA e la NPS anke la aktualaji-programo NOVA, qua en 2010 remplasesis per Nieuwsuur. En 1995 la diversa novaji-buletini dal brodkasterii che NPO Radio 1 remplasesis per la Radio 1 Journaal.

Depos januaro 2007 esas che NPO 3 specala edituro dil jurnalo por plu yuna publiko (18 til 50 yari) nome la NOS Journaal op 3. NOS Headlines esis la nomo dil novaji-buletino che (i.a.) NPO 3FM de sis kloki matine til sep kloki vespere. La buletino komencis en 2000 kom 3FM Nieuws.

Televiziono redaktar

La programi quin la NOS ipsa facas esas pri novaji, aktualaji e sporto. Ol responsas pri la sequanta programi:

  • NOS Evenementen - specala, incidentala televizion-brodkasti di nacional ed internaciona eventi, exemple pri Prinsjesdag o la terorista atenti di la 11ma di septembro 2001. Ofte kunlaboro kun altra brodkasterii (til 2005 'NOS Actueel').
  • NOS Journaal - novaji-buletino, varianta longese de 5 til 30 minuti. La programo aparas che NPO 1 e NPO 2.
  • NOS op 3 - jurnalo qua esas distinta kam la NOS Journaal. Ol aparas che NPO 3 e NPO 3FM.
  • NOS Studio Sport - generala sportprogramo, kun "live"-a konkurso-raporti, sportnovaji, interviuvi e raporti. Anke esas programi Studio Voetbal, Studio Sportzomer e De Avondetappe. La redakterio di Studio Sport provizas anke la NOS Sportjournaal.
  • NOVA/Den Haag vandaag - en ca aktualaji-programo provizas la NOS la parlamentala rubriko Den Haag Vandaag, en qua aparas diala raporti pri politikala eventi, kunlabore kun la redakterio di NOVA (depos 2010 remplasita per Nieuwsuur).
  • NOS Jeugdjournaal - jurnalo specale por pueri, brodkastata che la puerobrodkasterio NPO Zapp.
  • Nieuwsuur - aktualajiprogramo kun NTR en qua generala novaji e sportonovaji prizentesas.
  • NOS Gesprek met de minister-president - kurta diskuto ye venerdio kun la prima ministro.
  • Andere Tijden Sport - sportodokumentali, kun VPRO.

Radio redaktar

Anke ye radio provizas la NOS novaji- e sportoprogrami. Inter la programi esas:

  • NOS Journaal - omnahore novaji-buletino che publika radiokanali e regionala kanali.
  • NOS op 3 - novaji ed aktualaji che NPO 3FM e FunX
  • NOS Langs de Lijn - sportprogrami, kun interviuvi, diskuti e raporti pri sporto
  • NOS Met het Oog op Morgen - radioprogramo dum la tarda vespero pri aktualaji
  • NOS Radio 1 Journaal - novaji- ed aktualajiprogramo che NPO Radio 1
  • Nieuws en Co - programo kun novaji ed aktualaji, cienco, kulturo e diversaji che NPO Radio 1

Guverno redaktar

La NOS formacis, kom brodkasterio sen membri, kun la NPO (Nederlandse Publieke Omroep) un legala organizuro: la Nederlandse Omroep Stichting. Por plubonigar la guverno, la Mediawet ye 1ma januaro 2010 emendesis. Depos 1ma januaro 2009 la NOS esas nedependanta organizuro kun propra statuti, e komitato qua konsistas ek Jan de Jong (generala direktisto), Geert Hofman (komercala direktisto) e komitato surveyala qua konsistas ek la komitato dil NPO (Henk Hagoort, Ruurd Bierman, Cees Vis).