Mez-klaso

La termino mez-klaso ordinare referas individui kun socioekonomiala nivelo inter le povra e le richa. Existas du vidopunti pri "quo esas mez-klaso": la vidopunto da Max Weber e la vidopunto da Karl Marx.

Procento di mondala habitantaro, segun sociala klaso (sinistre) e procento di partopreno en mondala richeso (dextre).

Mez-klasa familii en Usa ordinare rezidas en domi komprita per presti pagebla dum 25 yari e havas du automobili, quale en la fotografuro.

Segun Max Weber, la socio stratigesas segun kontinuo en tri paralela dimensioni: la dimensiono ekonomiala, la dimensiono politikala, e la dimensiono sociala. La bazo di la konceptajo pri sociala klaso esas la dimensiono ekonomiala, malgre ke nulatempe Weber identifikis ula "mez-klaso". Studiisti influita da lua verki identifikas individui kun "teknikala inteligenteso" (profesionali e tekniki qui laboras en kontori, ne en industriala o rurala produktado, o la "mikra borgezaro", to esas, individui qui havas kelka kapitalo, ma nesuficanta por vivar exkluzive de ol.

Segun Marxista vidopunto, "mez-klaso" komence esis tale nomizita borgezaro, to esas, la sociala klaso konsistanta ordinare ek komercisti, qua existis inter l'aristokrataro o nobeleso, e la ruranaro. Kun la developo di kapitalismo e di la socii e la komenco di partopreno di richa borgezi en la dominacanta politiko, la termino "mez-klaso" asociesis kun individui qui havas kelka proprieto, tamen nesuficanta por dedikar su exkluzive ad explotar la proletariaro, o tale-nomizita "mikra borgezaro" (petite burgeoise).