Luddisti

La Luddisti (Angle: "Luddites") esis radikala grupo de angla texisti dum la 19ma yarcento qui destruktis texo-mashini kom formo de protesto.

La grupo protestis kontre uzo di mashini ye maniero "doloza e trompiva" por cirkumirar normala laboro-praktiki. La Luddisti timis, korekte, ke lia tempo pasata pri lernar la habilesi di lia mestiero disipesos pro ke mashini remplasos lia rolo en la industrio.

Esas miskompreno ke la Luddisti protestis kontre la mashini ipsa kom esforco haltigar la progreso di teknologio. Dum la yari, tamen, la termino signifikeskis ulu qua opozas industrialigo, automatigo, komputorigo, o nova teknologii generale. La Luddisto-movado komencis en Nottingham, Anglia e kulminis per tot-regiona revolto qua duris de 1811 til 1816. Fabrikeriestri komencis pafar protesteri e fine la movado supresesis per militala forteso.

Malgre ke l'origino dil nomo 'Luddite' esas necerta, la movado supozite nomizesis pro Ned Ludd, aprentiso qua raportite frakasis du texo-mashini en 1779 e lua nomo simbolizis la mashino-destrukteri. Ned Ludd, tamen, esis tote fiktiva ed uzita por shokar la guvernerio. La nomo evolucionis aden l'imaginala Generalo Ludd o Rejo Ludd, qua, same kam Robin Hood, reputite lojis en Sherwood-Foresto.