Kriti esas insulo qua jacas en estala Mediteraneo. Ol esas la kinesma maxim grandi insulo di Mediteraneo e la maxim grand insulo di Grekia. Lua longeso esas 250 km ma ol esas nur ye 12-60 km larja.

Kriti en Grekia.

La prehistoriala urbo Knossos redaktar

La 16ma di marto 1900 l'arkeologo Arthur Evans kompris tereno en la insulo Kriti, ube situesas la restaji di la prehistoriala urbo Knossos. La ruinaji deskovresis da lokala komercisto en 1878, e kelka exkavadi facesis. Evans (1851-1941) komencis explorar la exkavuri en 1894. Pos la kompro, plu granda exkavadi facesis da multa lokala laboranti employita da Evans. Pos du monati la restaji di granda parto di la "Palaco di Minos" (tale nomizita da il) deskovresis. L'exkavadi duris dum plura yari. La civilizuro montrita per la restaji existis de 2500 aK til 1200 aK, dum qui prosperis diversa arti. Argila skribotabeleti trovesis, montranta du tipi di literi, nomizita lineara A e lineara B.

La duesma tipo, en frua Grekiana linguo, deschifresis en 1952 da Michael Ventris. Ilua intereso komencis en 1936 kande, kom skolano, il asistis diskurso di Arthur Evans. Dum ke il sequis kariero kom arkitekto, il duris studiar lineara B, konstatante ke ol esis Grekiana linguo. Il mortis en automobilo-acidento en 1956, evante 34 yari, kelka semani ante ke ilua edituro pri la linguo aparis.