Krampo

Krampo esas subita, senvola e doloroza kontrakto di muskulo. Malgre tempala e nedomagiva, krampi povas produktar intensa doloro e tempala paralizeso dil muskulo afektata. Ol povas durar dum kelka sekundi o minuti. Muskulala krampi eventas ofte, ed asociesas kun gravideso, intensa exercado, od evo (ol eventas plu ofte en olda individui). Ol anke povas asociesar kun la manko di magnezo o kalio en l'organismo. Por preventar ol, kelk atleti inkluzas banano, spinato, fazeolo ed altra nutrivi en lia dieti, e drinkas mineral aqui richa en ca elementi. Cakaze, ol ne esas asociata kun morbi ed esas benigna. Ma ank existas krampi asociata a patologii, nome desordini nerval-muskulala.

Krampi diferas de spasmi, nam spasmi esas sequi di senvola e rapida kontrakti muskulala e ne esas doloroza, kontre ke krampo esas unfoya kontrakto muskulala, intensa e doloroza.