John de Mol Jr.

Johannes Hendrikus Hubert "John" de Mol, Jr. (24ma aprilo 1955) esas nederlandana komunikili-magnato.

De Mol esas un ek la homi qui fondis la produkto-kompanii Endemol e Talpa. Ilua evaluita richeso esas cirkume US$ 1,5 miliard.

Il esas la filiulo dil olima kantisto John de Mol Sr. e la fratulo di Linda de Mol.

Frua vivo

De Mol kreskis en modesta, ma ne richa Gooiana familio. La filii mustis kompletigar sua posho-pekunio kom jurnalo-livristo o per butiko-laboro. De Mol, che la gimnazio, havis talento pri futbalo. Pos lua havo-exameno il esperis entamor kariero kom profesionala futbalisto. 'Kande me atingis la balono e samtempe altru', il dicis en 1993 ad Ischa Meijer, 'lo esis lukto: esis por me nula limito, e me vinkis.' Sis yari pose De Mol divenis komisito che la futbal-klubo Ajax.

Kande lua patro divenis direktisto di la pirato-brodkasterio Radio Noordzee, lua intereso movis de futbalo a la muzik-industrio. Il divenis teknikisto che "diskjockey" Joost den Draaier e pos nelonga tempo darfis ipsa plear diski. La bazo di lua televizion-kariero establisesis che Studio Sport, ube De Mol parta-tempe asemblis la saliaji di futbal-konkursi. Che TROS il komencis intertempe kom helpanta produktisto, ma pro rapida departo da lua jeristi, il produktis evanta nur 23 yari granda ludo-programi quala De Showbizzquiz.

Endemol

De Mol, bone-konocata personaleso en Nederlando, aquiris sua fortuno per produktar televizion-programi. Dum 1997-1999 il developis la tre populara realeso-televizion-serio Big Brother kun sua samnoma produkto-kompanio, John de Mol Produkties. En 1994 lua kompanio kombinesis kun Joop van den Ende TV-Producties aden Endemol, ma ankore funcionis nedepende. Il anke produktis Fear Factor, Love Letters, 1 vs. 100 e Deal or No Deal (Miljoenenjacht en Nederlando) por Endemol. De Mol vendis sua porciono di Endemol en 2000 a Telefónica, ma duris servar kom kreiva direktisto til 2004.

En 2005, il inkluzesis en la listo dil revuo Forbes Magazine dil 500 maxim richa homi dil mondo.

En mayo 2007 De Mol retrovenis kom un ek la chefa acionieri di Endemol kun la italiana kompanio Mediaset di Silvio Berlusconi.

Talpa Media

Pos departar Endemol en 2004, De Mol fondis sua propra televizion-kanalo. La propozita nomo, Tien ("dek" en nederlandana), disputesis dal competitor SBS Broadcasting, qui proprietis la marko TV10. La kanalo mustis lansesar sub la marko Talpa (Latina por "talpo"). Pose la nomo-disputo finis, e la rinomizo di Talpa a Tien. La kanalo atingis poka spektanti, malgre ganar la yuri di la futbalo-ligo Eredivisie. En 2007 De Mol decidis klozar Tien e vendis la kanalo a RTL Nederland, reteninta parto di ta kompanio. De Mol anke vendis Radio 538 a RTL Nederland, quon il aquiris en 2005. Talpa restis la nomo di la kompanio di De Mol e la kompanio qua duris produktar plura programi por la RTL-reto, inkluzanta la tre sucesoza Ik Hou van Holland.

En 2010, nova realeso-serio, The Voice of Holland, lansesis da De Mol. Ol esis enorma suceso en Nederlando e la formulo vendesis a plura altra landi cirkum la globo. The Voice (of America) lansesis che NBC ye 27am aprilo 2011 kun de Mol e Mark Burnett kom exekutiva produktisti. En The Voice, la kanto-audi esas 'blinda': la jurio turnas la dorso a la kantanto. Se 'selektata' (per butono), la juriano turnas vers la kantanto. Ta koncepto, da de Mol e nederlandana kantisto Roel van Velzen, certigas ke lo koncernas "nur la voco."

Personala vivo

De Mol esis olim mariajita a la kantistino ed aktorino Willeke Alberti. La aktoro Johnny de Mol esas lia filiulo. La fratino di John, brodkastero ed aktorino Linda de Mol, prizentas, od aparas en, ula programi di Endemol, inkluzanta la originala nederlandana versiono di Deal or No Deal, Miljoenenjacht. El anke prizentis frua programo di Endemol, The DJ Kat Show