Jodhpur

Jodhpur esas urbo en India.

Vido di Jodhpur de la fortreso Mehrengarh

Jodhpur fondesis ye la 12ma di mayo 1459 da Rao Jodha. Il esis rejo di Mandore (urbo en nuntempa Rajasthan), la dek-e-kinesma tala rejo de la familio Rathore, e filiulo di Rao Ranmal qua divenabis rejo di Mandore en 1427. Pos la asasino di Rao Ranmal da rivalo, Rao Jodha mustis abandonar Mandore; dum multa yari il esforcis riganar la urbo, e sucesis en 1453.

Pro konsilo di santulo ke la chef-urbo devas esar situata ye somito di kolino, il selektis rokoza kolino 9 km sude de Mandore, ed en 1459 komencis la konstrukto di la fortreso Mehrengarh, de qua kreskis la urbo Jodhpur. Mehrengarh esis augmentata dum posa yari e divenis un de la maxim granda fortresi en India.