Ferry Cross the Mersey
"Ferry Cross the Mersey" (kelkafoye skribata Ferry 'Cross the Mersey) esas kansono skribita da Gerry Marsden.
Ol unesme registragesis da lua bando Gerry and the Pacemakers ed editesis en tarda 1964 en Britania ed en 1965 en Usa. Ol sucesis ye amba lateri dil Atlantiko, atinginte numero sis en Usa e numero ok en Britania.
La kansono esas de la muzikalo-filmo samnoma. Dum la meza-1990a yari, muzikala teatrajo anke titulizita Ferry Cross the Mersey naracis la Merseybeat-epoko di Gerry Marsden; ol unesmafoye pleesis en Liverpool ed anke pleesis en Britania, Australia, e Kanada.
"Mersey" referas la fluvio Mersey en nordwesta Anglia, olqua fluas aden la Irlandana Maro en Liverpool. La Mersey-paromo vehas inter Liverpool e Birkenhead e Seacombe sur la peninsulo Wirral.
La kansono ofte misortografiesas kom "Ferry 'Cross the Mersey", ma segun la liriki dil kansono, la korekta titulo esas "Ferry Cross the Mersey". "Cross" esas ne kontrakturo dil prepoziciono "across" (trans) ma imperativa verbo - "Ferry, cross the Mersey" (Paromo, transirez la Mersey).
En Usa, la titulo imprimesis sur omna 45-disketi - mem riedituri yardeki pos l'originala edito - kom "Ferry Across The Mersey".