Espero (pikturo)

pikturo da George Frederic Watts

Espero esas simbolista oleo-pikturo dal angla piktisto George Frederic Watts, di quo la unesma du versioni kompletigesis en 1886.

Duesma versiono di Espero, 1886

Radikale diferanta de antea trakti dil temo, ol montras sola okul-bandajizita muliero sidanta sur globo, pleanta liro qua havas nur un restanta kordo.  La fundo esas preske vakua, videbla esas nur unika stelo.  Watts intence uzis simbolismo, ne tradicionale asociata kun espero, por ambiguigar la senco dil pikturo.  Malgre ke lua uzo di koloro en Espero grande admiresis, lor olua expozeso multa kritikisti desprizis la pikturo.  Espero esis populara che la Estetikala Movado, qui egardis beleso kom la prima skopo di arto e ne suciis pri la ambigueso di olua mesajo.  Riprodukturi ye platino-imprimuri, e plu tarde chipa karbo-imprimuri, balde vendesis.

Malgre ke Watts recevis multa kompro-ofri por la pikturo, il konsentabis donacar sua maxim importanta verki a la naciono, e sentis ke lu devas inkluzar Espero.  Konseque, plu tarde en 1886 Watts e lua helpanto Cecil Schott piktis duesma versiono. Lor olua kompletigo Watts vendis la originalo e donacis la kopio a la South Kensington-Muzeo (nun la Viktoria ed Albert-Muzeo); do, ca duesma versiono esas plu bone konocata kam la originalo.  Il piktis adminime du plusa versioni por privata vendo.

Dum ke chipa riprodukturi di Espero, e de 1908 alta-qualesa imprimuri, cirkuleskis granda-quante, ol divenis vaste populara imajo.  Prezidanto Theodore Roosevelt expozis kopio che sua hemo en Sagamore Hill, Nov-York; riprodukturi cirkulis mondvaste; en 1922 filmo naracis la kreo da Watts dil pikturo.  Lore Espero sembleskis ekmoda e sentimentalacha, e Watts rapide ekmodeskis.  En 1938 la Tate-Galerio cesis permanante expozar sua kolekturo de verki da Watts.

Malgre la diminuto dil populareso di Watts, Espero restis influiva.  En 1959 Martin Luther King Jr. skribis prediko, nun konocata kom Shattered Dreams, segun la temo dil pikturo, quale anke agis Jeremiah Wright en Chicago en 1990.  En la kongregaciono che la lasta esis la yuna Barack Obama, qua profunde emocigesis.  Obama selektis "La Audaco di Espero" kom la temo di sua diskurso koram la Demokrata Nacionala Konvento en 2004, e kom la titulo di sua libro di 2006; il fondis sua sucesoza prezidantala kampanio en 2008 sur la temo "Espero".