Duos habet et bene pendentes
Duos habet et bene pendentes (Latine ‘Lu havas du e bone pendanta’), o Testes habet et bene pendentes (‘Lu havas testikuli e bone pendanta’), o Habet duos testiculos et bene pendentes (‘Lu havas du testikuli e bone pendanta’), od abreviate Testiculos habet (‘Lu havas testikuli’) o nur Habet! (‘Lu havas!’) esas supozata procedo lor la elekto dil papo, per qua on konfirmis ka l’elektito havas maskulala qualesi e pose dicis la frazo.
La mito pri la rituo kreesis pro famoza mezepokala legendo, la kazo pri papino Ioanna. Multa verki, sive erudital, sive literatural, insertabis ta legendo, segun qua supozeble muliero fingis esar viro e povis okupar la papeso meze dil 9ma yarcento, dum cirkume du yari, til ke dum procesiono inter la baziliki di Santa Petrus e Santa Ioannes di Laterano el parturis infanto, e lore lua trompo deskovresis. Pro to, de lore on dicis ke irga papal kandidato mustas subisar kontrolo por konfirmo di lua sexuo. Por to, lu supozeble sideskis sur specala stulo, la sedia stercoraria, kun mezala truo, tra qua insinuesis la genital organi, e yuna diakono konfirmis lua vireso.[1] La versioni ne konkordas pri kad on konfirmis lo nur vide o palpe, o ka l'exekutanto esis diakono o yuna kardinalo. Pos la konfirmo e la proklamo, la asistanti dil ceremonio supozeble respondis Deo Gratias (‘Danko a Deo’).[2] Papo Adrianus la 6ma supozeble abolisis la kustumo en la 16ma yarcento. Tamen konservesas la ilustruri da Lawrence Banka, qui montras la probo pri maskuleso di Innocentius la 10ma, papo inter 1644 e 1655.
En la Muzei di Vatikano konservesas la famoza sedia stercoraria, expozata al vizitanti.[3]
Referi
redaktar- ↑ La poesía burlesca de Quevedo y sus modelos italianos - Autoro: Rodrigo Cacho Casal. Pag.: 158-159
- ↑ Saints & sinners: a history of the popes - Autoro: Eamon Duffy. Pag.: 157-158
- ↑ El palpado testicular a los Papas y la leyenda de la Papisa Juana, Yahoo Noticias España, 8ma di oktobro 2012.
Bibliografio
redaktar- The She-Pope: A Quest for the Truth behind the Mystery of Pope Joan. Publikigita da Heineman. Loko di publikigo: Londres. Dato di publikigo: 1998.