Codarts esas internaciona universitato en Rotterdam, Nederlando, qua ofras art-eduko pri muziko, danso e cirko.

Edifico di Codarts

L'universitato havas cirkume 1.000 studenti, kun 50 nacionalesi, e c. 340 employati.  Ol establisesis en sua nuna loko en 2000.

Codarts havas origino en la Rotterdam Conservatorium voor Muziek, populare konocata kom Conservatorium Holthaus pro sua direktisto, Jos Holthaus (1879-1943).  En 1930 l'alternativa Rotterdamsch Toonkunst Conservatorium fondesis kun la kompozisto Willem Pijper kom direktisto.  La Rotterdamse Dansschool establisesis en 1931 da Corrie Hartong kom direktisto e la germana dansisto Gertrud Leistikow kom docisto.  Unesme la danso-skolo esis parto del Conservatorium Holthaus.  En 1935 la danso-skolo transferesis al konservatorio di Pijper.

La Rotterdamse Dansschool rinomizesis Rotterdamse Dansacademie en 1954.  En 1986 la konservatorio e dans-akademio divenis la Hogeschool voor Muziek en Theater Rotterdam.  La skolo translojis aden sua prezenta moderna edifico apud la koncerto-halo De Doelen en 2000 sub la nomo Codarts - hogeschool voor de kunsten.  La programo di cirko-arti lansesis en septembro 2006.

La Rotterdam-Konservatorio esas un ek la maxim granda konservatorii en Nederlando, kun plu kam 900 studenti.  Ol ofras kursi per qui studenti povas obtenar grado en irga ek plura temi: muzikala teatro, pop-muziko, jazo, kompozo/aranjo, muziko-produkto, arjentiniana Tango, indiana muziko, Flamenco, Latina/Latina jazo/brazilana, turka muziko, klasika muziko, e muziko en eduko.

La skolo aranjas publika plei, kelkafoye che l'adjacanta koncerto-halo De Doelen.  Tale en aprilo 2011 gasto-duktero Arie van Beek duktis la Codarts-Orkestro e Codarts-Koro en pleo en la Jurriaanse-Halo.  En septembro 2011 la Codarts Ensemble pleis programo qua exploris la frontiero inter klasika muziko e jazo, kun verki da Stravinsky, Gershwin, Shostakovich, Antheil e Harvey.

La Havo voor Muziek en Dans provizas sekundara eduko en qua muziko e danso esas parto del diala programo.  Ol esas kunlokizita en la Codarts-edifico, e docisti di Codarts docas ibe.  La skolo preparas studenti por alta muzik-eduko, ma gradiziti mustas tamen sucesar eniro-exameni por durar che Codarts.

L'edifico abutas ye la koncerto- e konfero-edifico De Doelen (1966), hemo dil Rotterdams Philharmonisch Orkest.  Ol konstruktesis kom parto de projeto por extensar De Doelen definita en 1993 da Jan Hoogstad.  Nova tereno apud la Kruisplein kreesis per diminutar la grandeso di Karel Doormanstraat, e to uzesis por la Doelen-extensuro e la Codarts-edifico.  L'edifico developesis dal arkitekturo-firmo Ector Hoogstad, e kompletigesis en 2000.  La plinto uzesas precipue por komercala skopi.  L'edifico esas relative alta por akomodar la bezoni dil skolo, e havas tota spaco de 10.500 metroquadrati.  Vidale, la Codarts edifico semblas preterirar la fino dil konfero-centro. La stala skeleto dil edifico suportas "buxo en buxo"-desegno por l'interna spaci, inkluze plura alta spaci kun variebla lumizo.  Longa eskalatoro konektas la eniro-foyero kun la kinesma etajo.  Ta esas la chef-etajo por Codarts, kun la restorerio, biblioteko e plura pleo-chambri, e duktas a teraso sur la tekto di De Doelen.  Codarts okupas docochambri e kontori sub ta etajo.  La konservatorio esas super ol e la granda danso-atelieri esas en la supra etaji.  L'edifico esas kovrita per briki por fitar aspekte kun la proxima apartament-edifici.