"Cloudbusting" esas kansono skribita, produktita e pleita dal Britaniana kantistino Kate Bush.

Wilhelm Reich

Ol esis la duesma disketo de elua albumo di 1985 Hounds of Love.  "Cloudbusting" atingis numero 20 en Britania.

La kansono esas pri la tre proxima relato inter la psikologo e filozofo Wilhelm Reich e lua yuna filiulo, Petro, de la vidpunto di la matura Petro.  Ol deskriptas lua memori di lua vivo kun Reich che lia familio-farmeyo, Orgonon, ube ili pasis tempo per "cloudbusting" (lit. nubo-krevado), pluvigo-procedo en qua on vizas la cielo per mashino desegnita e konstrukita da Reich, nomizita "cloudbuster" (nubo-krevilo).

La liriki pluse deskriptas la abrupta aresto ed enkarcerigo di Wilhelm Reich, la perdo-doloro sentita dal yuna Petro, e lua nepovo protektar sua patro.  La kansono inspiresis dal memorialo da Petro Reich di 1973, A Book of Dreams, quan Bush lektis e da qua el profunde afektesis.

Jurnalisto Amy Hanson laudis la kansono pro olua "splendideso" e "hipnota mantro-efekti".  Hanson skribis: "Sekureso e danjero permeas la kansono, per pensema liriki e violoncelo-pulsata melodio.  Mem plu tresayiganta, ma apene surprizanta, esas la facileso per qua Bush povis kaptar la instanto kande puero unesme konstatas ke adulti esas eroriva."

Video-filmo redaktar

La muziko-video, direktita da Julian Doyle, konceptesis da Terry Gilliam e Kate Bush kom kurta filmo.  En la video pleas kanadana aktoro Donald Sutherland kom Wilhelm Reich, e Bush en la rolo di lua yuna filiulo, Petro.  La filmo montras ili sur la kolmo di kolino probanta funcionigar la "cloudbuster".  Reich lasas Petro sur la mashino e retroiras a sua laboratorio.  Retrospekte, il rimemoras plura foyi il e Petro juis kunlaborar pri diversa ciencala projeti, til ke il interruptesas da guvernerio-agenti qui arestas ilu e spolias la laboratorio.  Petro sentas la danjero di sua patro ed esforcas atingar ilu, ma mustas spektar senpove dum ke sua patro forduktesas.   Petro fine retrokuras a la "cloudbuster" ed aktivigas ol sucesoze, delektanta sua patro qua vidas la pluvesko.

 
Donald Sutherland

La filmo eventis en la Vale of White Horse en Oxfordshire, Anglia.  La kolino sur qua la mashino sidas esas Dragon Hill, nemediate sub la Uffington White Horse, prehistoria kolino-figuro videbla kurte.  Bush saveskis la hotelo ube Sutherland lojis del kuafisto dil aktorino Julie Christie, e vizitis lua chambro por persone pregar lu partoprenar la projeto.

En Britania, la muziko-video montresis che ula cinemi akompane la chef-filmo.  Pro desfacileso obtenar laboro-visto por Sutherland kurta-friste, l'aktoro ofris laborar gratuite.  Malgre ke l'eventi en la naraco eventis en Maine, la jurnalo-ektranchuri en la filmo dicas "The Oregon Times," probable refero ad "Orgonon", la hemo e laboratorio di Reich.

La mashino en la video nur surfacale similesas la reala "cloudbuster", quo esis plu mikra kun plura streta, rekta tubi, ed operacesis sur la sulo.  Refere la fonto di la kansono, Bush tiras exemplero di "A Book of Dreams" da Peter Reich ek la surtuto di Sutherland.

Altra versioni redaktar

Utah Saints riuzis ("sampled") la lineo "I just know that something good is going to happen" por lia kansono "Something Good" (1992), ultre ceni de la video por lia video.  Ol atingis no. 4 en Britania e no. 8 kande ri-editita en 2008.