Choseo di Giganti

La Choseo di Giganti esas rokaro an la nord-estala litoro di Nord-Irlando (Bushmills), qua konsistas de cirkume 40.000 bazalt-koloni. Depos 1986 la rokaro esas sur la listo di Mondala Patrimonio di UNESKO. La rokaro esus la rezulto di volkanerupto, ante 60 milion yari. La loko esas la maxim multe vizitat atraktajo di Nord-Irlando.

Nomo

L'Irlandana-lingua (kelta) nomo di la Choseo di Giganti esas Clochán na bhFómharach, quo signifikas "L'Amaseto de petri di Fomoires." L'Angla-lingua nomo esas Giant's Causeway.

Legendo

La legendo esas ke l'Irlandana giganto Fionn mac Cumhaill konstruktis voyeto tra la maro (causeway) a Skotia por kombatar kontre sua Skotian adverso Benandonner. Ye l'instanto ke Fionn arivas en Skotia, il vidas ke Benandonner esas mem plu granda kam il ipsa ed il rifugas ad Irlando. Ibe arivinte, persequata da la Skotiana giganto, Mac Cumhaill pregas a sua spozino maskar ilu kom infanto. Ye l'instanto kande Benandonner arivas en Irlando, il vidas la muliero kun l'infanto, quo timigas lu pro la grandeso dil infanto, imaginante ke la patro di tala grand infanto esos multe plu grand e forta kam il ipsa e rifugas a Skotia. Dum ilua fugo Benandonner destruktas la voyeto. De la voyeto nur la komenco en Irlando e la fino en Skotia (la Kaverno di Fingal sur l'insulo Staffa) restos.