Charles Ives

Charles Ives (n. 20ma di oktobro 1874, m. 19ma di mayo 1954) esis Usana komercisto e kompozisto.

Il naskis en Danbury, Connecticut Usa. Evante dek-e-quar yari il divenis orgenisto ye la lokala kirko. Il studiis muziko ye Universitato Yale de 1894 til 1898. Ilua kariero esis en asekurado, ed il kompozis dum semano-fini, produktante granda quanteso de muziko: simfonii ed altra orkestrala muziko, kansoni, muziko por piano, korala muziko ed altraji. Il poke interesis su pri publika pleado di ca verki. Il cesis kompozar en 1926, e la kompozuri gradope divenis konocata dum sequanta yari. En sua kompozuri il experimentis pri nekustumala ritmi, plura-tonaleso, ne-tonaleso, e ne-kustumala ensembli de instrumenti.