Centro di la Finlandala Lingui
La Centro di la Finlandala Lingui esas la institucuro, en qua studiesas e mantenesas la Finlandana linguo e la Suediana linguo (la versiono parolata en Finlando). Ibe koordinesas anke la laboro di la delegitaro di la Laponiana lingui, di la (Finlandala) gestolinguo e di la Cinagolinguo.
La nomo di la Centro esas en la Finlandana Kotimaisten kielten keskus, en la Suediana Institutet för de inhemska språken, en la (Nord-)Laponiana Ruovttueatnan gielaid guovddás, en la Angliana Institute for the Languages of Finland, en la Germaniana Zentrum für die Landessprachen Finnlands, en la Rusiana Центр языков Финляндии.
Maxim granda parto de la laboro publikigesas kom dicionarii, studiala artikli e monografii. La Centro mantenas la lingui e donas helpo en nomizo di la loki. La Centro organizas linguala kursi ed instruktas per telefonilo. Anke la arkivi esas uzebla a la populani.
La Centro
- direktas e developas la Finlandana linguo e la Suediana linguo (la versiono di la Suediana, qua esas parolata en Finlando).
- koordinas la laboro di la delegitaro di la Laponiana lingui, di la (Finlandala) gestolinguo e di la Cinagolinguo.
- kompilas dicionarii (un- e dulinguala) pri la nomizita lingui.
- studias la linguomantenanta e la dicionariala laboro, qua suportas la Finlandana linguo e la Suediana linguo en diversa anguli: vortari, nomaro, la uzo di la lingui en diversa situesi, la ancieneso e moderneso di la lingui, la diverseso e la manieri.
- Instruktas e guidas en linguala problemi.
- Atribuas a la studiisti la arkivi e la materii.
Ye la komenco di la yaro 2012 en la Centro laboris 76 homi.
La Centro esas experto-institucuro por la Docadala e Kulturala Ministerio di Finlando. Pri la funciono di la Centro esas ediktita en lego pri la Centro (en la Finlandana).
Originale la Centro fondesis ye 1976 e tatempe la nomo esis La Studiala Centro di la Finlandala lingui. En la riorganizo la studiala parto di la centro diminutesis rilokizante la studiisti en diversa universitati di Finlando. Ante la riorganizo en la Centro laboris plu kam 100 homi.