Berthe Morisot
Berthe Morisot (Bourges, 14ma di januaro 1841 – Paris, 2ma di marto 1895) esis Franca impresionista piktistino.
El esis la unesma muliero qua adheris grupo de impresionisti, e malgre protesti da familiani ed amiki el duris esforcar vers agnosko di ca artoformo.
En 1857 el komencis desegno-lecioni e kopiis multa verki, del olda maestri til Jean-Baptiste Corot. Kun Corot el anke kontaktis. De 1860 til 1862 el esis ilua studento, kun sua fratino Edma. Corot konsilis el irar ad Auvers-sur-Oise ed ibe lernar piktar en libera aero (en plein air). En 1864 aparis elua unesma peizaji che la Salon.
En 1868 el konoceskis Édouard Manet ed amikeskis kun il. Manet influegis elua developo e stilo. Nequale la maxim multa impresionisti, qui facis optikala kolorexperimenti, elektis Morisot e Manet plu konservema metodo, malgre ke Morisot ibe influis Manet ed instigis il selektar la koloraro dil impresionisti ed uzar min multa nigro.
En 1872 el voyajis tra Hispania. En 1874 el mariajesis kun Eugène, la fratulo di Manet. Inter 1874 e 1886 el partoprenis che omna impresionista expozi, ecepte la quaresma di 1879 (pro maladeso pos la nasko di elua filiino Julie). Dum 1881-1883 li konstruktis domo en Paris, quo divenis renkontreyo por piktisti e skribisti, quala Edgar Degas, Gustave Caillebotte, Claude Monet, Camille Pissarro, James McNeill Whistler, Pierre-Auguste Renoir, Stéphane Mallarmé ed altri. Mallarmé divenis elua maxim bona amiko e granda admiranto.
Berthe piktis precipue mulieri e pueri, ed interne ed extere, en pensema kompozuri e brilanta kolori. El esis la maxim famoza muliera reprezentanto di impresionismo.
En 1892 elua spozulo mortis, ed el kompris kastelo en Mesnil. Pos elua morto en 1895 eventis granda expozo che Paul Durand-Ruel.