Luís Carlos Prestes

Luís Carlos Prestes
Profesiono: politikisto
Lando: Brazilia
Naskodato: 3 di januaro 1898
Nasko-loko: Porto Alegre, Rio Grande do Sul
Mortodato: 7 di marto 1990
Morto-loko: Rio de Janeiro, Rio de Janeiro

Luís Carlos Prestes (1898 til 1990) esis Braziliana militisto e politikisto. Dum la yari 1920ma il esis un ek la chefi di politikala rebeleso konocata kom "Tenentismo", qua eventis ta epoko kontre la politikala oligarkii en Brazilia. Pose, dum lua exilo en Buenos Aires dum la komenco dil yari 1930ma ilu divenis membro e chefo di la komunista partiso di Brazilia (PCB).

En 1935 ilu fondis l'Aliança Nacional Libertadora (nacional uniono por libereso - ANL), politikala uniono di komunisti e socialisti komandita per PCB kontre la guvernerio di Getúlio Vargas. Pos la falio di komunista rebeleso en novembro 1935 Prestes e lua spozino Olga Benário enkarcerigesis en marto 1936. Olga Benário, judino kun Germana origino sendesis a Germania, ube mortigesis en chambro di gaso. La filiino di Olga e Prestes, Anita Leocádia, naskis en koncentreyo ma sendesis a Brazilia ante la morto di lua matro. Tamen, kande Vargas abandonis lua simpatio por fashismo e nacional-socialismo, Prestes pardonis Vargas e chanjis lua atitudo por politikala suporto pri il.

Kande la diktatoreso di Vargas finis en 1945, Prestes recevis amnestio ed elektesis senatano por Rio de Janeiro. Il partoprenis en l'asemblajo qua aprobis la konstituco di 1946. En 1948 PCB deklaresis ne-legala e Prestes perdis lua politikala yuri. Quankam Komunista Partiso esar proskriptita dum la yari 1950ma, Prestes suportis la nacionalista politiki di Getúlio Vargas til lua suocido en 1954.

Kande eventis militistala stato-stroko en Brazilia 1964 Prestes exilis su en Sovietia til l'aprobo di la lego pri amnestio en Brazilia, en 1979. Kande ilu retroiris a Brazilia la nova membri di PCB ne aceptis ilu kom chefo. Il abandonis PCB en 1982 ed eniris la partiso PDT (demokratiala laborala partiso) fondita da Leonel Brizola.