Les Temps modernes ("Moderna Tempi") esas franca jurnalo, fondita da Simone de Beauvoir e Jean-Paul Sartre.

L'unesma numero editesis en oktobro 1945.  Ol nomizesis pro filmo da Charlie Chaplin.

Les Temps modernes plenigis la lakuno lasita da la desaparo dil maxim importanta pre-milita literaturala revuo, La Nouvelle Revue Française egardita kom la revuo di André Gide, qua klozesis pos la liberigo di Francia pro ke ol kunlaboris kun la okupeso.

Les Temps modernes unesme editesis da Éditions Gallimard.  Intertempe, la revuo chanjis editerio trifoye: Julliard (januaro 1949 a septembro 1965), Presses d'aujourd'hui (oktobro 1964 a marto 1985), Gallimard (aprilo 1985 al prezento).  Les Temps modernes cesis editesar en 2019, pos 74 yari.

L'unesma redakteraro konsistis ek Sartre (direktisto), Raymond Aron, Simone de Beauvoir, Michel Leiris, Maurice Merleau-Ponty, Albert Ollivier, e Jean Paulhan.  Omna ti editis multa artikli por la revuo.  Kontributi da Sartre inkluzis "La nationalisation de la littérature" ("La Nacionaligo di Literaturo"), "Matérialisme et révolution" ("Materialismo e Revoluciono"), e "Qu'est-ce-que la littérature?" ("Quo esas Literaturo?").  Simone de Beauvoir unesme editis Le Deuxième Sexe ("La Duesma Sexuo") en Les Temps modernes.

En la prefaco dil unesma edituro, Sartre asertis la skopo dil revuo: editar littérature engagée.  Ta filozofio o di literaturo expresas bazala kredo di existantalismo - ke persono responsas pri koncianta decidi exkutar sociale utila agi.  Tale literaturo en la revuo devas havar utilitista elemento; ol ne esez nur kulturale valoroza (arto por la skopo di arto).  Altra intelektozi, quala André Gide, André Breton, e Louis Aragon, desaprobis ica skopo.  Sartre respondis: "Le monde peut fort bien se passer de la littérature. Mais il peut se passer de l'homme encore mieux." ("La mondo povas facile funcionar sen literaturo.  Ma ol povas funcionar mem plu facile sen la homaro.")

Verki da multa nova skribisti qui pose divenis famoza aparis en Les Temps Modernes.  Li inkluzas Richard Wright, Jean Genet, Nathalie Sarraute, Boris Vian, e Samuel Beckett.