Halloween

Halloween (pron.: helowin) esas folkloral e pagana festo tradicionala ek la Britaniana insuli qua celebresas omnayare ye la 31ma di oktobro vespere, t.e. la vespero ante la Kristana festo di Omna Santi. Olua nomo esas kontrakturo dil Angla vorti All Hallows-Even ("Vespero ante Dio di Omna Santi").

Kurkurbiti di Halloween

Etimologio

La vorto Halloween venas de la Angla linguo, e nule relatas l'Irlandana linguo od irg altra Kelta linguo. Ol esas kontrakturo di All Hallows Eve, qua signifikas "Vespero ante Dio di Omna Santi". Hallow esas arkaika formo dil Angla vorto holy ("santa") ed even esas kustumala formo por evening ("vespero"). L'ortografio Hallowe'en duras ultempe uzesar en Kanada e Unionita Rejio: "e'en" ya esas la kontrakturo di even e divenis "een".

Praktiko

Nuntempe Halloween celebresas precipue en Irlando, Britania, Usa, Kanada, Australia, Nova-Zelando e, min forte, en multa altra landi.

Segun la nuna tradiciono maxim konocata, la infanti e pueri travestias su per hororigiva kostumi de fantomo, sorcisto, monstro edc. ed iras sonigar an la pordi por demandar friandaji dicante: "Trick or treat!" ("Trompo o bonboni!"). Dum la vespero povas esar anke pirotekni, puerala ludi, lektado di hororo-rakonti o Halloween-poemi, spektado di hororo-filmi, edc.