Daniel Radcliffe kom Harry Potter
Profesiono: cinem-aktoro
Lando: Unionita Rejio
Naskodato: 23 di julio 1989
Nasko-loko: London, Anglia
Mortodato:
Retoloko: https://www.danieljradcliffe.com

Daniel Jacob Radcliffe (n. 1989) esas Anglian aktoro, quon cinemo-regardisti agnoskas kom Harry Potter de filmi bazinda libri da J. K. Rowling.

Radcliffe naskis en Fulham, London, ed esas la sola filiulo di Alan Radcliffe e Marcia Gresham, qui esas familiara kun cinemo-mondo e ne volis ke sua filio divenus aktoro. Ma fortunoze li chanjis sua opiniono e Daniel aparis sur skreno en TV-versiono di David Copperfield - romano di Charles Dickens.

En 2000 Radcliffe selektesis da kelka mil kandidati por plear Harry Potter en unesma filmo, Harry Potter e la stono di filozofo ("Harry Potter and the Philosopher's Stone" en Angla), quo joyis granda suceso. Duesma rolo di Radcliffe esis mikra rolo en "The Tailor of Panama", ma ca filmo esis pronta vere ante "Harry Potter", do olu divenis l'unesma cinemo-filmo kun Radcliffe quo atingis la skreno.

En 2001, 2004 e 2005 sequanta filmi pri yuna mago kun Radcliffe kom Harry Potter venis aden cinemi en tota mondo, ed omni havis granda suceso ed obtenis granda profiti. Radcliffe anke recevis bona salario, e kun banko-konto evaluita en £23 milioni ilu esas maxim richa yunulo en Anglia.

En sua privata vivo Radclife lernas en Skolo di London, pleas baso-gitaro, joyas gitaro-muziko, esas fanatiko por la futbalo-klubo Fulham Football Club e suportas multa karitati.