Coventry esas urbo en la regiono West Midlands (Westala Mezalandi) di Anglia.

Coventry en 2011

Historiale parto dil komtio Warwickshire, Coventry esas nun en la komtio West Midlands. Ol esas la 9ma maxim granda urbo en Anglia, e la 12ma maxim granda en Britania.

Coventry distas 31 km este-sudeste de Birmingham, 39 km sudweste de Leicester, 18 km norde de Warwick e 151 km nordweste de London. Coventry esas anke la maxim centrala urbo en Anglia.

La nuna katedralo konstruktesis pos ke majoritato del 14ma-yarcenta katedralo destruktesis da la Luftwaffe (Nazi-germana aer-armeo) dum la Coventry Blitz ye 14 novembro 1940.

Industrio esas importanta en Coventry ed aparte automobilo-fabrikerii, inkluze la kompanii Rover e Jaguar Cars. Dum la 18ma e 19ma yarcento, Coventry esis importanto centro por la fabriko di horloji e horlojeti.

L'urbo havas tri universitati, la Universitato di Coventry en la urbo-centro, la Universitato di Warwick en la sudala preurbo, e la privata Arden University.

Loko di Coventry en Anglia e komtio West Midlands

Coventry sufris severa bombardo-domajo dum la Duesma Mondo-Milito. Eventis enorma aero-bombardo ye 14 novembro 1940 aden la matino di 15 novembro 1940. Fairo-bombardi tadie produktis severa domajo en la urbo-centro e che la historiala katedralo, qua lasis nur shelo e la klosh-turmo. Plu kam 4000 domi domajesis o destruktesis, plus cirkume tri quarimi del industriala fabrikerii. Plu kam 800 homi ocidesis, e mili vundesis o divenis senhema.

En 2021 Coventry esos la Urbo Kulturala di Britania ("UK City of Culture").