Paradiz-ucelo
Paradiz-uceli (Paradisaeidae) esas familio de uceli dil ordino kant-uceli, qui esas preske tote restriktita a Nov-Guinea e cirkondanta insuli, e nordesta Australia. Kelka sorti trovesas anke sur la Moluka-insuli. Paradiz-uceli esas kovrita per kolorozega plumi. Ico esas la rezulto di ecesanta sexuala selekto, quo esis posibla pro manko de naturala enemiki.
Li esas forte-konstruktita uceli kun sat pezoza beko e povoza gambi e pedfingri. Lia grandeso varias de ta di sturno til ta di korniko, ma ula sorti aspektas signifikante plu granda pro sua longa flanko- e kaudoplumi. La bruna siklobeko (Epimachus meyeri) havas longeso 97-100 cm, ma granda parto de to esas la kaudo. La maskuli esas generale brilanta-kolora ed ornita per veli, manteleti, abaniki e tale plus. Li esas poligama. Che la min remarkinda sorti la maskuli e femini havas simila plumaro. Li esas generale monogama.
Che la monogama sorti la maskulo helpas pri sorgo di la genituro; che la poligama sorti ne. Un grupo, la siklobeki (speci Drepanornis e Epimachus) havas remarkinda longa kurva beki, per quo li tiras animaleti ek la foliaro od ek trui en kortico. Frukti formacas la bazala menuo, ma anke beri, semini, insekti, altra senvertebreti, rani e reptereti manjesas. La nesti dil maxim multa sorti esas bolatra, e che la poligama sorti konstruktesas nur da la femini, qui anke prisorgas lo cetera: kovo dil ovi, eduko dil yuni, e possorgo. Nur la rejoparadiz-ucelo nestifas en arborotrui.
La bruna paradiz-korniko trovesas sur le Moluka, e la Wallace-paradiz-ucelo sur Bacan e Halmahera (Nord-Moluka). La maskuli di plura sorti konocesas pro sua abundanta plumaro, kun ofte longa, kolorozega plumi. La maskuli probas per ica plumaro, dum ofte komplikita kurtezo, impresar la multe min remarkinda femini.