Kyiv

chef-urbo di Ukrainia
(Ridirektita de Kiev)
Kyiv
Collage of Kiev.png
Kelk imaji pri Kyiv.
Flag of Kyiv Kurovskyi.svg COA of Kyiv Kurovskyi.svg
Standardo Blazono
Lando: Flag of Ukraine.svg Ukraina
Regiono: Oblast Kyiv
Informo:
Fondita ye: 482
Latitudo: 50°27'00" N
Longitudo: 30°31'24" E
Altitudo: 179 m
Surfaco: 839 km²
Habitanti: 2 950 819 (2019)
Denseso di habitantaro: 3517,07 hab./km²
Horala zono: UTC+2
(UTC+3 dum la somero)
Urbestro: Vitali Klitschko
Mapo:
Mapo di Kyiv
Oficala retosituo:
www.kmr.gov.ua/

Kyiv esas chef-urbo e maxim populoza urbo di Ukraina. Ol havis 2 950 819 habitanti[1] en 2019. Lua tota surfaco esas 839 km².

Strado en Kyiv.

L'urbo esas importanta centro industriala, ciencala, edukala e kulturala de Estal Europa. Importanta industrii di alta teknologio, skoli e historiala monumenti jacas ibe. L'Universitato Nacionala di Kyiv Taras Shevchenko, o simple "Universitato di Kyiv" fondesis en 1834, e judikesas kom la maxim prestijosa de Ukraina.

On dicas ke lua nomo devenas del nomo di un ek lua fondinti, Kyi. Ol esas un ek la maxim anciena urbi de Europa, e dum lua historio, ol vivis epoki di prospereso e di dekado. Lua skribita historio komencas kun la naraco di lua destrukto dum Mongola invado, en 1240. Dum la sequanta yarcenti l'urbo esis provincala chef-urbo kontrolita da povoza vicini: La Granda-dukio Lituania, la Komunitato Polonia-Lituania, la Granda dukio Moskva, la Rusa imperio e fine Sovietia.

HistorioRedaktar

 
Fondo di Kyiv en 482, segun moderna pikturo.

Quale montras arkeologiala restaji, Kyiv e lua vicineso ja habitesis dum paleolitiko (petr-epoko). Dum la bronz-epoko la populo qua habitis la regiono apartenis a la nomizita "kulturo Cucuteni–Trypillia". La populi qui habitis la regiono dum fer-epoko praktikis agrokultivo e komercis kun la populo Skita e kun la tribui qui habitis apud la Nigra maro.

Segun legendo, Santa Andreas anuncis dum la yari 60 o 70 pos Kristo la futura lokizo di granda urbo ube nune jacas Kyiv. Segun altra legendo, l'urbo fondesis cirkume la 5ma yarcento da 3 fratuli, Kyi, Shchek and Khoryv, e lia fratino Lybid. La nomo "Kyiv" signifikus "apartenanta a Kyi". La frati esis estala Slavi, e la fondo dil urbo eventis dum la yaro 482, segun la sama legendo.

Historiisti kredas ke kolonieto ja existis en la regiono dum la 6ma yarcento. Segun la historiisto Kevin Alan Brook, l'urbo fondesis dal populo Khazar o dal Hungari. Brook afirmas ke Kyiv esas Turka nomo: Küi signifikus "fluviala rivo" ed ev signifikus "kolonieto".

Dum la 8ma e la 9ma yarcenti, Kyiv esis avanposteno dil imperio Khazar. Tamen, la tradicionala treko komercala uzita da Vikingi ("Varangani") por komercar kun la Greki trairis la urbo, e dum la fino di la 9ma o komenco di la 10ma yarcento, tradicionala Varangana familio komencis administrar ol.

En 1240 Kyiv destruktesis komplete dum la Mongola invado di Rus', komandita da Batu Khan. Ca evento afektis profunde l'estal Slava civilizuro. Lor l'invado, Kyiv havis plu kam 100 mil habitanti ed esis un ek la maxim granda urbi de la mondo. En 1320, Lituanian armeo komandita dal granda duko Gediminas vinkis la princo Stanislav de Kyiv che la batalio dil fluvio Irpen e konquestis l'urbo. En 1324-1325 le Tatar revanchis, e malgre Kyiv guvernesis da Lituaniana princo, ol mustis pagar tributi al Ora Hordo.

 
Kyiv, de 1400 til 1600.

En 1362 o 1363, pos la batalio di la Blua Aqui (Ukrainane: Bytva na Synikh Vodakh) la granda duko Algirdas de Lituania konquestis la princio di Kyiv e vicina regioni, qui divenis parto dil Granda-dukio Lituania.[2] En 1482, le Tatar de Krimea spoliis e brulis granda parti dil urbo.[3] Kande Polonia-Lituania kreesis en 1569, la regioni di Ukraina kontrolita da Lituania (Podolia, Volinia e Podlachia) transferesis de la Granda-dukio Lituania a la Rejio Polonia, e l'urbo divenis parto de la gubernio di Kyiv (Polone: Województwo kijowskie).

En 1654 l'urbo okupesis da Rusa trupi, ed pos 1667 ol divenis parto de la Cario di Rusia. Nulu ek la pakti inter Polonia e Rusia pri Kyiv ratifikesis. Dum Rusa imperio, Kyiv esis precipue pilgrimo-centro por Kristani ortodoxa e nasko-loko di multa importanta personi del imperio. Tamen, ol divenis importanta komercala urbo erste dum la 19ma yarcento. En 1834, Rusa guvernerio inauguris l'Universitato Santa Vladimir, nune Universitato Taras Shevchenko. Dum la yari 1840a, Mikola Kostomarov (Ruse Nikolay Kostomarov) fondis la sekreta Frataro di Santa Cirilius e Santa Metodius, qua defensis ideo pri unigo di libera populi Slava, e ke Ukrainani esis populo separata de Rusi, ne subordinata a la Rusi. Rusa autoritatozi rapide supresis ca frateso, e komencis "Rusigo"-procedo en Ukraina, tra stimulo a migrado di Rusi a la regiono.

 
Kyiv, cirkume 1900.

Kyiv prosperis dum la fino dil 19ma yarcento, divenis la 3ma maxim populoza urbo dil imperio, ed importanta centro por transporti ed industrio. En 1900, ol ja havis cirkume 250 mil habitanti. Pos la Rusa revoluciono di oktobro 1917, Kyiv divenis chef-urbo dil Popul-Republiko Ukraina, e subisis l'efekti di multa konflikti: l'okupo dal Germani de la 2ma di marto 1918 til novembro sam yaro, dum l'unesma mondomilito; la konflikti di Rusa interna milito de 1917 til 1922; e la milito Polonia-Sovietia de 1919 til 1921. Dum la lasta tri monati di 1919, l'urbo okupesis da Blanka Armeo. L'urbo subisis 16 okupi de la fino di 1918 til 1920.

 
Kyiv en 1937

De 1921 til 1991 Kyiv apartenis a la Republiko Socialista Sovietiana Ukraina, un ek la fondinta republiki di Sovietia. Dum la yari 1920a l'industrio rapide expansesis. De 1932 til 1933 granda famino devastis parto ek lua habitantaro. En 1934 ol divenis chef-urbo di Sovietiana Ukraina.

 
Bombardita quarteri en Kyiv, 1944.

Germani okupis Kyiv ye la 19ma di septembro 1941 dum la duesma mondomilito, e mortigis o kaptis cirkume 600 mil soldati Sovietiana. De la kaptiti, la maxim multa ne transvivis. Pos ke Germani kaptis l'urbo, grupo di oficisti de NKVD dinamitagis la maxim multa edifici de Khreshchatyk, la precipua strado dil urbo, ube multa edifici okupesis dal Germani. Germani akuzis lokala judi e kaptis cirkume 34 mil ek li, qui sendesis a la ravino Babi Yar e masakresis ye la 30ma di septembro 1941. On kalkulas ke plu kam 100 mil personi sendesis a Babi Yar e mortigesis til la fino di la milito.

Pos la milito, l'urbo rekuperis su, ed itere divenis la 3ma maxim granda urbo de Sovietia. En 1986, 100 km norde del urbo, eventis la katastrofo di Chernobyl. Tamen, pro ke la venti suflas desude vers nordo, la radioaktiveso ne kontaminis ol.

Dum la krulo di Sovietia, Ukrainana parlamento deklaris Ukraina nedependanta de Sovietia ye la 24ma di agosto 1991. De 2004 til 2005, dum tale nomizita "oranjea revoluciono", eventis la maxim granda demonstri pos la fino di Sovietia. De novembro 2013 til februaro 2014 eventis granda protesti en la placo Maidan Nezalezhnosti ("placo di la nedependo") kontre Ukrainana guvernerio, pos ke ol decidis ne signatar asocio-kontrato kun l'Europana Uniono.

GeografioRedaktar

 
Satelital imajo pri Kyiv e Dniepr.
 
L'estala rivo dil fluvio Dnieper.

La reliefo di Kyiv esas kolinoza weste del fluvio Dniepr, qua fluas tra ol norde til sude. Este del Dnieper, la tereni esas basa e plana. Existas kelka insuli en la fluvio. Multa arei an l'estala rivo di Dniepr, nomizita Livyi bereh ("estala rivo") drenesis e kovresis per sablo, e protektesas per digi.

La klimato dil urbo esas humida kontinentala (Dfb segun la klimatala klasifikuro da Köppen). Maxim varma monati esas junio, julio ed agosto, kun mezavalora temperaturi de 13,8°C til 24,8°C. La maxim kolda monati esas decembro, januaro e februaro, kun mezavalora temperaturi de -4,6°C til -1,1°C. Nivas ordinare de la duimo di novembro til la fino di marto, kontre ke l'epoko sen pruino duras dum cirkume 180 dii omnayare. La maxim kolda temperaturo mezurita en Kyiv esis −32.9 °C, la yaro 1951.

La mezavalora yarala pluvo-quanto esas 621 mm, e la maxim pluvoza monato esas junio, kun mezavalore 82 mm.

Panoramo pri Podil, un ek la centrala quarteri di Kyiv.

TransportoRedaktar

 
Metroala staciono Pozniaky.
 
Elektral autobuso e taxio che strado Maidan Nezalezhnosti.

Kyiv havas linei di metroo, sistemo di autobusi e mikr-autobusi, elektral autobusi, tramveturi, taxii, funikulari e sistemo di urbala treni che surfaco. Lua metroo havas entote 66,1 kilometri en 3 linei, kun 51 stacioni. Ol inauguresis ye la 6ma di novembro 1960 e nun transportas cirkume 1,4 milion veheri omnadie. Transporto per metroo reprezentas 38% ek la publika transporto del urbo.

L'unesma projeto pri tramveturala transporto facesis en 1886, ed inauguresis en 1891. En 1892 ol komencis uzar elektrala vehili. Nun existas 23 tramveturo-linei en la urbo kovranta 139,9 kilometri. Ca sistemo gradope remplasabas da linei di eletral autobusi.

La funikularo dil urbo konstruktesis de 1902 til 1905 e konektas du niveli dil urbo, trairanta la kolino di Santa Vladimir. Omna sistemi di publika transporti di Kyiv, ecepte kelka mikr-autobusi, administresas dal publika kompanio Kyivpastrans. La preco dil bilieti uzata en publika transporto regulesas dal guvernerio dil urbo, e la tarifi esas plu chipa kam en westala urbi.

La sistemo di taxii di Kyiv duras kreskar, tamen ol ne regulesas. Quale en altra urbi Europana, la sistemo UBER, uzanta privata vehili, ank existas en Kyiv.

Quale arivar en KyivRedaktar

 
La choseo E95 proxim Kyiv.
 
L'aeroportuo Boryspil.

Du aeroportui servas Kyiv: l'aeroportuo Boryspil distas 29 km este del urbo, ed esas la maxim grand aeroportuo di Ukraina. Cirkume 65% ek l'aerala transporto di personi en la lando facesas per Boryspil, inkluzite la maxim multa internaciona flugi. Segun statistiki de 2019, Boryspil uzesis da 15 260 300 veheri. L'aeroportuo Zhuliany distas 7 km sud-weste de la centro di Kyiv, e transportis 2 617 900 veheri en 2019. L'aeroportuo Hostomel, jacanta en vicina urbo, uzesas nur por transportar vari, esanta la bazo por l'aviono Antonov An-225.

Esas posibla arivar e departar de Kyiv per l'Europana chosei E40, E75, E95 ed E373. La choseo E40 trairas Ukraina, liganta la frontiero kun Rusia este, a Calais, Francia, weste. La choseo E95 ligas Sankt Peterburg, en Rusia a la portuala urbo Odessa e, de ibe, a Merzifon, en Turkia. En Kyiv existas 8 ponti super la fluvio Dnieper.

Ferovoyi kun 1520 mm-a rod-eskarto ligas Kyiv a vicina urbi, ad altra Ukrainana urbi, ed anke a Rusia, Bielorusia, Azerbaijan, Estonia e Moldova. De la staciono Kyiv-Pasazhyrskyi anke departas treni qui ligas ol a Bucarest, Košice (en Slovakia), Warszawa e Wien, tamen on bezonas kambiar di treno en frontierala stacioni, nam ca landi uzas 1435 mm-a rot-eskarto.

Pri fluviala transporto, la portuo dil urbo antee uzesis por transportar pasajeri, ma nun uzesas nur por transportar vari e por turistala bateli.

Panoramo pri Kyiv dum sunokusho.

SportoRedaktar

 
Futbalo-stadio Olimpiiskyi.
 
Ludisti de Sokil Kyiv (blue).

Kyiv havas multa amatora e profesionala futbalo-klubi, inkluzite Dynamo Kyiv, Arsenal Kyiv e FC Obolon Kyiv. FC Dynamo Kyiv esas ma maxim sucesoza ek li, e dum lua historio ol ganis 13 foyi la championkonkurso Sovietiana, e 16 foyi l'Ukrainiana championkonkurso pri futbalo. Pri altra sporti ultre futbalo, l'urbo gastigas la klubo Sokil Kyiv pri hokeo* sur glacio, e la basketbalo-klubo BC Budivelnyk, ambe multe sucesoza en lia rispektiva sportala ligi.

Dum l'Olimpiala Ludi en Moskva, 1980, Kyiv gastigis kelka preliminara ed un ek l'eliminanta futbalo-partii en lua Olimpiala stadio, qua rikonstruktesis por l'evento. Depos la 1ma di decembro 2008 ca statio itere rikonstruktesis por satisfacar la normi por gastigar la Championkonkurso Euro 2012.

TurismoRedaktar

 
Katedralo di Santa Sofia.
 
Monakeyo di Santa Mikail

Inter la precipua turistala atraktivi di Kyiv esas lua kirki, exemple la katedralo di Santa Sofia, de 1037,[4] e la monakeyo Kyiv-Pechersk Lavra, de 1051, ambe havanta oratra kupoli, e judikata kom "Mondala Patrimonio di la Homaro" segun l'UNESKO. Sub la monakeyo Kyiv-Pechersk Lavra existas katakombi, ube esas sepultata plu kam 100 personi, kelk ek li judikata kom santi dal Ortodoxa eklezio.

La nuna monakeyo di Santa Mikail esas kopiuro, inaugurita en 1999, de anciena katedralo qua komencis konstruktesar dum la 12ma yarcento e kompleteskis dum la 18ma yarcento. Dum Sovietian epoko, ol destruktesis.[5] En la kloshoturmo dil monakeyo, qua anke havas oratra kupoli, existas muzeo qua explikas lua historio. La stilo del internajo dil monakeyo esas Bizancana, kontre ke lua exterajo esas en Baroka Ukrainana arkitekturo.

 
Monumento a la Matro Patrio.
 
Tanki en la Nacionala Muzeo pri Historio di Ukraina dum la Duesma Mondomilito.

La monumentala 62-metra statuo "Matro Patrio" (Batkivshchýna-Máty) konstruktesis per stalo super 40-metra piedestalo ed inauguresis ye la 9ma di mayo 1981, por memorigar plu kam 11.600 soldati e 200 laboristi qui recevis la titulo "heroo di Sovietia" dum la duesma mondomilito.

La statuo di la Matro Patrio esas parto de la Nacionala Muzeo pri Historio di Ukraina dum la Duesma Mondomilito (Музей історії України у Другій світовій війні) qua ank inauguresis ye la 9ma di mayo 1981. La muzeo kovras 10 hektari e gastigas milital equipuri uzita da Sovietia dum la duesma mondomilito, e skulti qui reprezentas Germana invado en 1941, l'okupo dil urbo dal Naziisti, la rezisto di la partizani, e la batalio dil Dieper, eventinta en 1943.

Altra muzei
  • Muzeo pri Aviacado: gastigas Sovietian avioni, exemple Antonov An-2, Tupolev Tu-104, Il-62, Il-76 ed Il-82. La muzeo jacas interne l'anciena aeroportuo Zhulyany.
  • Muzeo Chernobyl: ol gastigas objekti qui memorigas la konsequi di Chernobyl-katastrofo.
  • La Nacionala Muzeo pri Arto di Ukraina: establisita en 1899, ol gastigas pikturi e skulturi de la 12ma yarcento til nun, nome de artisti de Baroka epoko.
 
Muzeo pri zoologio.
  • La Nacionala Muzeo pri Naturala Histori de la Nacional Akademio pri Cienco di Ukraina kontenas 5 muzei: pri geologio, pri paleontologio, pri zoologio, pri botaniko e pri arkeologio. Ol inauguresis en 1966.
  • La Muzeo pri Arti Ocidentala ed Orientala prezervas, inter altri, ceramikaji de la 9ma yarcento e glezita kareli de la 14ma til la 17ma yarcenti, bronza objekti e broduri.

Kyiv ed IdoRedaktar

En Kyiv esis lokala aktiva Ido-grupo qua nomesis Amikeso. La chefo di la klubo esas la instruktisto Boris Aaronov. Pos la morto di Boris Aaronov ye la yaro 1987 la aktiviso di la klubo cesis.

ReferiRedaktar

  1. Main Department of Statistic — population on 01.12.2019.
  2. Jones, Michael (2000). - The New Cambridge Medieval History, Volume 6, c.1300–c.1415 - Cambridge University Press.
  3. Jerzy Lukowski, W. H. Zawadzki (2006). A concise history of Poland. pp. 53 Cambridge University Press.
  4. Explore Kiev (Portugalana). Trip Advisor. URL vidita ye la 25ma di aprilo 2021.
  5. St Michael's Golden-Domed Monastery (Angla). Lonely Planet. URL vidita ye la 25ma di aprilo 2021.
Commons havas kontenajo relatante a:


Chef-urbi di Europana landi

Amsterdam · Andorra la Vella · Athina · Beograd  · Berlin · Bern · Bratislava · Bruxel · Budapest · Bucarest · Dublin · Helsinki · Kyiv · Chisinau · København · Lisboa · Ljubljana · London · Luxemburg · Madrid · Minsk · Monako · Moskva · Nikosia · Oslo · Paris · Podgorica · Praha  · Reykjavík · Riga · Roma · San-Marino · Sarajevo · Skopje  · Sofiya · Stockholm · Tallinn · Tbilisi · Tirane · Vaduz · Valletta  · Warszawa · Vatikano · Wien · Vilnius · Yerevan · Zagreb