Granda Sudbury
Granda Sudbury, ofte referata simple kom Sudbury, esas urbo en Ontario, Kanada.
Ol esas la maxim granda urbo en Norda Ontario segun habitantaro (160.274 en 2011) e la 24ma maxim granda metropolala areo en Kanada. Segun areo, ol esas la maxim granda urbo en Ontario e la sepesma maxim granda municipo segun areo en Kanada. Ol esas administrale un-strata municipo, e tale ne parto di irga distrikto, komtio, o regionala municipo.
Sudbury fondesis pos la deskovro di nikel-erco da Tom Flanagan, kanadana forjisto che la Pacifiko-Fervoyo en 1883, kande la transkontinenta fervoyo esis preske kompleta. Granda Sudbury formacesis en 2001 per kombinar la urbi ed urbegi dil olima Regionala Municipo di Sudbury kun plura nemunicipigita urbi.
La habitantaro rezidas en urbana kerno e multa mikra komunesi cirkum 300 lagi ed inter petra kolini nigrigita da historiala erc-extraktado. Sudbury esis olim importanta ligno-centro e mondo-duktero ye nikel-minado. Minado e relatanta industrii dominacis la ekonomio dum granda parto dil 20ma yarcento. La du granda mino-kompanii qui formizis la historio di Sudbury esis Inco, nun Vale Limited, quo employis plu kam 25% del populo en la 1970a yari, e Falconbridge, nun Glencore. Sudbury depose expansis de *resurso-fondita ekonomio a la precipua endetala, ekonomiala, sanesala ed edukala centro di Nordesta Ontario. Sudbury esas anke la hemo di granda Franca-Ontariana populo quo influas olua arti e kulturo.
Sudbury havas humida kontinentala klimato kun varma ed ofte varmega someri e longa, kolda, nivoza vintri.