Afrobeat esas muziko-jenro qua karakterizesas da kombino di elementi de West-Afrikana muzikala stili quala fuji-muziko e "highlife", kun influi de usana funk e jazo, enfokigante plan-kantata voci, komplexa intersekanta ritmi, e perkuto.

La termino inventesis dal nigeriana multa-instrumentalisto e bandestro Fela Kuti, qua esis pioniro e popularigero di la jenro, tam en - kam exter Nigeria. Ol parte naskis ek probo distingar la muziko da Fela Kuti de la "soul"-muziko di usana artisti quala James Brown.

"Afrobeat" venas de Ghanana "highlife" dum la frua 1960a yari. Ol pose developesis en la sudala parto di Nigeria dum la tarda 1960a yari, da Fela Kuti, qua experimentis per diversa muziko di ta tempo. Kuti anke chanjis la nomo di lua grupo ad Africa '70. La bando mantenis kin-yara "rezidanteso" che Afrika Shrine de 1970 til 1975 dum ke "afrobeat" prosperis che nigeriana yuni.

Malgre ke la termino "Afrobeat" inventesis tam frue kam 1968, pos voyajo ad Usa, Kuti ne vere facis muziko en la kategorio Afrobeat. La nomo “Afrobeat” montras la signifiko di "groove" che la muziko, kontraste "Afrofunk".

Multa jazo-muzikisti atraktesis ad "Afrobeat". De Roy Ayers dum la 1970a yari a Randy Weston dum la 1990a yari, esis kunlabori qui rezultis en albumi quala Africa: 'Centre of the World' da Roy Ayers, editita dal kompanio Polydor en 1981. En 1994 Branford Marsalis, l'usana jazo-saxofonisto, inkluzis cherpaji ("samples") de "Beast of No Nation" da Fela en sua albumo Buckshot LeFonque. La nova generaciono de "DJ"-i e muzikisti di la 2000a yari, qui ameskis la materio da Kuti ed altra rara edituri, facis kompiluri e rimixuri di ta edituri, tale ri-introduktante la jenro a nova generacioni de askoltanti e fanatiki di "afropop" e "groove".

"Afrobeat" anke profunde influis importanta tatempa produktisti e muzikisti quala Brian Eno e David Byrne, qui citas Fela Kuti kom esencala influo. Amba viri laboris pri l'aklamita albumo di 1980 'Remain In Light' da Talking Heads, qua duktis poliritma "Afrobeat"-influi a Westala muziko.