Historio di Barbados

L'unesma habitanti di Barbados esis aborijeni Arawak e Karib, qui arivis al insulo veninta de Sud-Amerika cirkume 350 til 400 aK. Portugalani vizitis l'insulo en 1536 ma ne koloniigis ol. Hispani anke vizitis l'insulo ma ne okupis ol. Kelk indijeni Arawak de Britaniana Guyana enmigris al insulo dum la yari 1800a, e duras vivar ibe.[1]

Hispana mapo pri isla del Barbado.
James Hay, 1ma komto Carlisle, Lord Proprietor ("Lordo* proprietanto") de Barbados.

Unesma Angli arivis en la navo Olive Blossom, e desembarkis en la regiono di nuna Holetown en 1625. Li okupis l'insulo en nomo dil rejulo James la 1ma, e komencis kultivar sukrokano en 1640[2] e transportis Afrikana sklavi por kultivar ol.

En 1780, forta uragano mortigis 4.000 personi. En 1854, epidemio di kolero mortigis plu kam 20.000 personi.[3]

Barbados sempre havis granda autonomio: unesma lokala asemblajo instalesis en 1639. En 1807, Britaniani abolisis la komerco di sklavi, ma ne la sklaveso. En 1816 eventis granda revolto di sklavi, en qua 20.000 sklavi partoprenis. La revolto faliis, e 120 sklavi mortigesis en kombati od mortigesis nemediate. Altra 144 judiciesis ed mortigesis pose. Sklaveso fine abolisesis en 1833. La nombro di sklavi ta yaro esis 83.000.

En 1884, membri de la societo di agrokultivisti di Barbados skribis letro a Francis Hincks, Kanadana politikistulo, e demandis l'admiso di Barbados en Kanadana Kunfederuro. Tamen, proprietanti di plantaceri e Britanian-decendanta komercisti formacis la majoritato di la personi kun yuro por votar, e ne aceptis ta ideo. Plu kam 70% de la habitantaro, nome mulieri, ne darfis votar.

Portuo di Bridgetown en 1902.

La decendanti di sklavi komencis revendikar politikal yuri erste dum la yari 1930a. Un ek la chefi de ta movado, Grantley Adams, fondis la partiso Barbados Labour Party en 1938.

En 1952, jurnalo Barbados Advocate konsultis diversa Barbadana politikisti, advokati ed entraprezisti e deskovris ke li favoris federuro kun altra Karibian insuli. De 1958 til 1962 Barbados esis membro di la Federuro di Westal Indii.

Standardo di Barbados, adoptita pos nedependo.

Fine, la lando divenis nedependanta de Unionita Rejio ye la 30ma di novembro 1966 kom monarkio, kun Elizabeth la 2ma di Unionita Rejio kom rejino e J.M.G.M. Adams, filiulo di Grantley Adams, kom chefministro. De 1946 til 1980 la procento-kresko dil habitantaro diminutis 1/3 pro enmigro vers Unionita Rejio.[4]

En 1983, Barbados ed altra Karibiana landi unionis kun Usa por invadar Grenada ed ekpulsar marxista rejimo.[5] En 1985, J.M.G.M. Adams mortis, e Bernard Saint John divenis chefministro.

Sandra Mason, unesma prezidanto di Barbados.

Ye la 15ma di septembro 2020, la guvernerio anuncis ke la lando divenus republiko ye la 30ma di novembro 2021, la 55ma aniversario di la nedependo di la lando, cesanta esar monarkio de la Commonwealth. Segun inquesto facita ye la 30ma di oktobro 2021, 34% suportis l'ideo pri divenar republiko, 30% esis indiferenta, 24% ne mencionis prefero, e nur 12% deziris restar monarkio. Ye la 30ma di novembro 2021, lora generala guvernisto Sandra Mason divenis l'unesma prezidanto di Barbados. En januaro 2022, la partiso di lora chefministrino Mia Motley obtenis tota la 30 sidili dum parlamental elekto.

Referi redaktar

  1. "Origin of the Eagle Clan", Pan-Tribal Confederacy of Indigenous Tribal Nations.
  2. Barbados: Just Beyond Your Imagination. Hansib Publishing (Caribbean) Ltd. 1997. p. 46, 48. ISBN 1-870518-54-3
  3. "Barbados". Library of Congress Country Studies.
  4. "Barbados - population" - Publikigita da Library of Congress Country Studies. Idiomo: Angla.
  5. Enciclopédia Delta Universal - vol. 1 - Editora Delta, Rio de Janeiro, Brazilia. Pag. 1149-1150